Վթարի ենթարկված ավտոբուսի ուղևորները պատմել են դեպքի մասին (Տեսանյութ)

ԵՐԵՎԱՆ, 3 նոյեմբերի. /Նովոստի–Արմենիա/.Մոսկվա-Երևան ավտոբուսի վթարի հետևանքով տուժածները պատմել են վթարի մասին, տեղեկացում է TeleTula կայքը։

Ուղևորներից մեկը պատմել է, թե ինչպես է շտապօգնության մեքենան իրեն հիվանդանոց տեղափոխել։ Այժմ տղամարդն իրեն նորմալ է զգում։ Տուժածը նաև նշել է, թե չգիտի, թե ինչո՞ւ է տեղի ունեցել վթարը։

Մեկ այլ տղամարդ, որը վնասվածքներ է ստացել, ասել է, որ հիշում է, թե ինչպես շրջվեց ավտոբուսը։ Նա նշել է, որ չի կարողացել դուրս գալ ավտոբուսից։ Տղամարդը պատմել է, որ իր հետ եղել է նաև մայրը, սակայն նրա վիճակի մասին այժմ ինքը տեղյակ չէ։

 
Տուլայի ՃՏՊ-ի հետևանքով զոհվել է 8, տուժել՝ 42 ՀՀ քաղաքացի, որոնցից 34-ը՝ հոսպիտալացվել են տարածաշրջանային Ուզլովայա (14 մարդ), Կիրեևսկի (12 մարդ) և Նովոմոսկովսկի (7 մարդ) բժշկական կենտրոններ: Վիրավորներից 9-ի վիճակը բժիշկների գնահատմամբ ծանր է: Ավտոբուսում երեխաներ չեն եղել:

Տուժածների անուններին կարող եք ծանոթանալ այստեղ>>

Դեպքի փաստով հարուցվել է քրեական գործ «Ճանապարհային երթևեկության կանոնների խախտում, որն անզգուշորեն  հանգեցրել է  երկու և ավելի զոհի» հոդվածով:

Տուլայի ՆԳ աշխատակիցները երկու հիմնական վարկած են առաջ քաշել`  ավտոբուսի տեխնիկական անսարքությունը, սակայն չի բացառվում, որ վարորդը կարող է քնած լինել ղեկին։

Տուլայում ՃՏՊ-ի  վայր են մեկնել  Ռուսաստանում ՀՀ դեսպանության ՏԿԱԻՆ ներկայացուցիչ Արտակ Ղազարյանը, ինչպես նաև ՀՀ ոստիկանության և քննչական կոմիտեի ներկայացուցիչները, հաղորդում է ՏԿԱԻՆ պաշտոնական կայքը:

Տեղեկատվության տրամադրման կոորդինացումը իրականացվում է ՀՀ տարածքային կառավարման և արտակարգ իրավիճակների նախարարության կողմից:

Գործում են թեժ գծեր`
- Տուլայի տարածաշրջանի ՃԿԿ-ում` 007 487 221 1609
- ՀՀ ՏԿԱԻՆ ճգնաժամային կառավարման ազգային կենտրոնում` 911 կամ 010 36-02-97 հեռախոսահամարներով:

Նոյեմբերի 3-ին, ժամը 04.44-ին ՌԴ ԱԻՆ ԱՃԿԿ-ից տեղեկատվություն է ստացվել, որ ժամը 03.08-ին Մ-4 դաշնային ավտոճանապարհի 220-րդ կմ-ում՝ Տուլայի տարածաշրջանի Ուզլովսկիյ շրջանի Իլինկա գյուղի մոտակայքում Մոսկվա-Երևան երթուղու «Կինգ Դելյուքս» ՍՊԸ տրանսպորտային ընկերությանը պատկանող «Higer» մակնիշի 510 OP 61 պետհամարանիշով ավտոբուսը դեռևս չբացահայտված հանգամանքներում դուրս է եկել երթևեկելի մասից և շրջվել:-0-