Երևանում ԿԱՄԱԶ–ը բախվել է ցուցանակ տեղադրող մեքենային. ցուցանակ տեղադրողը մի քանի մետրից վայր է ընկել

ԵՐԵՎԱՆ, 15 մայիսի./Նովոստի–Արմենիա/. Այսօր՝ մայիսի 15-ին, արտակարգ դեպք է տեղի ունեցել Երևանում։

Shamshyan.com–ի հաղորդմամբ, ժամը 10։40-ի սահմաններում 59-ամյա Ռոբերտ Մհերյանն իր վարած ԿԱՄԱԶ 5410 մակնիշի ավտոմեքենայով Բագրատունյաց փողոցում բախվել է Երևանյան լճի հարևանությամբ գտնվող կամրջի մոտ գովազդային ցուցանակ տեղադրող ավտոմեքենային։

Բախման հետևանքով ցուցանակը տեղադրողը, ով եղել է կռունկի համար նախատեսված հատուկ արկղում, վայր է ընկել մոտ 3 մետր բարձրությունից։

Վարորդը փախուստի չի դիմել, ահազանգել է շտապօգնություն և օգնել է վիրավորին տեղափոխել «Աստղիկ» բժշկական կենտրոն։

Փաստի առթիվ նյութեր են նախապատրաստվում։

Կայքի հաղորդմաբմ, դեպքի վայրում ԿԱՄԱԶ–ի վարորդի ինքնազգացողությունը վատացել է, և ոստիկանները շտապ օգնություն են կանչել, որը տեղում առաջին օգնությունն է ցուցաբերել։

Ոստիկանությունը պարզում է հիվանդանոց տեղափոխված վիրավորի ինքնությունը։–0–