ԵՐԵՎԱՆ, 3 սեպտեմբերի. /Նովոստի–Արմենիա/. Նախօրեին Երևանի Բրյուսովի փողոցի բնակարաններից մեկում երիտասարդ կնոջ դի է հայտնաբերվել։
Ինչպես հայտնում է ոստիկանության մամուլի ծառայությունը, քաղաքացու ահազանգով դեպքի հասցեով մեկնած օպերատիվ խումբը հայտնաբերել է 1991 թ. ծնված Նազելի Հովհաննիսյանի դին` պարանոցին և մարմնի տարբեր հատվածներում բռնության հետքերով:
Ոստիկանության Երևան քաղաքի վարչության, Կենտրոնական բաժնի և ԱԱԾ ծառայողների համատեղ ձեռնարկած օպերատիվ-հետախուզական միջոցառումների շնորհիվ պարզվել է, որ հանցագործությունը կատարել է Վրաստանի քաղաքացի 35-ամյա տղամարդը:
Նա սեպտեմբերի 3-ին, ժամը 02.50-ին, Վանաձոր քաղաքի հյուրանոցներից մեկից բերման է ենթարկվել:
Փաստի առթիվ ՀՀ քրեական օրենսգրքի 104 հոդվածի 1-ին մասի հատկանիշներով հարուցվել է քրեական գործ: Տղամարդը խոստովանական ցուցմունք է տվել և ձերբակալվել է։
Նշանակվել են դատաբժշկական, գենետիկական, կենսաբանական փորձաքննություններ:
Կատարվում է նախաքննություն: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում