21–ամյա Դավիթ Գևորգյանին օրը ցերեկով մեքենա է հարվածել Վորոնեժում (ՎԻԴԵՈ)
11:37
12 Ապրիլի 2019
ԵՐԵՎԱՆ, 12 ապրիլի. /Նովոստի–Արմենիա/. Ռուսաստանի ԱԻՆ Իվանովոյի հրշեջ–փրկարար ակադեմիայի Վորոնեժի մասնաճյուղի կուրսանտ Դավիթ Գևորգյանը ծանր վնասվածքներ է ստացել ՃՏՊ–ի հետևանքով։
Ինչպես հայտնում է ՌԴ քննչական կոմիտեն, միջադեպը տեղի է ունեցել Վորոնեժում ապրիլի 1–ի ցերեկը` 45–ամյա վորոնեժցին «Մերսեդեսով» սպանության դիտավորությամբ վրաերթ է կատարել 21–ամյա տղայի վրա, ինչից հետո դիմել փախուստի։ Ստացված մարմնական վնասվածքներով տուժածը տեղափոխվել է բժշկական հաստատություն։
Տուժածի մոտ ախտորոշվել է գլխուղեղի ցնցում, գլխի սալջարդեր, կրծքավանդակի սալջարդ, ձախ բազկահոդի սալջարդ, ձախ սրունքի հեմատոմա։
ՃՏՊ–ի փաստով ՌԴ Քննչական կոմիտեի Վորոնեժի մարսի քննչական մարմինները հարուցել են քրեական գործ 45–ամյա վորոնեժցու նկատմամբ ՌԴ ՔՕ 105–րդ հոդվածի 1–ին մասի հատկանիշներով (Մահափորձ)։
Ոստիկանների հետ փոխգործակցությամբ հայտնաբերվել է կասկածյալի գտնվելու վայրը, նա ձերբակալվել է նշված հանցագործության կատարման կասկածանքով։ Վորոնեժցուն վստահ ճանաչել է ականատեսը։
Հարցաքննության ժամանակ կասկածյալն օգտվել է ՌԴ Սահմանադրության 51–րդ հոդվածով նախատեսված իրավունքից` վկայություն չտալ ինքն իր դեմ։ Լուծվում է նրա խափանման միջոցի ընտրման հարցը։
Քրեական գործով 21–ամյա տղան ճանաչվել է տուժող և հարցաքննվել որպես տուժող, բուժումն ավարտելուց հետո կնշանակվի դատաբժշկական փորձաքննություն, հարցաքննվել են հանցագործության ականատեսները, կատարվում են համալիր միջոցառումներ` ուղղված հանցագործության բոլոր հանգամանքները պարզելուն։ Քրեական գործի քննությունը շարունակվում է։ -0-