ԵՐԵՎԱՆ, 27 հուլիսի. /Նովոստի–Արմենիա/. Այսօր առավոտյան խոշոր ու ողբերգական ավտովթար է տեղի ունեցել Սյունիքի մարզում:
Ժամը 08:15-ի սահմաններում BMW մակնիշի ավտոմեքենայի վարորդը Կապան քաղաքի օդանավակայանի մոտ դեռևս անհայտ պայմաններում դուրս է եկել երթևեկելի գոտուց և գլխիվայր շրջվել, հաղորդում է shamshyan.com–ը։
Загружается новость ... "Лево"
Վթարի հետևանքով 2 մարդ տեղում մահացել է: Փաստի առթիվ Կապանի քննչական բաժնում հարուցվել է քրեական գործ ՀՀ ՔՕ 242 հոդվածի 3-րդ մասի (Ճանապարհատրանսպորտային պատահար, որն անզգուշությամբ առաջացրել է 2 և ավելի մարդու մահ) հատկանիշներով:
Ոստիկանությունն ու քննչական բաժինը պարզում են վարորդի, մահացածների ինքնությունը:
Կայքի հաղորդմամբ, մահացածներից տղամարդուն հայտնաբերել են ավտոմեքենայից դուրս շպրտված, իսկ կնոջը՝ ավտոմեքենայի տակ:
Վթարը տեղի է ունեցել ոչ թե ճանապարհին, այլ ճանապարհից դուրս՝ օդանավակայանի տարածքում, և կա տեղեկություն, որ նրանք կարծես թե «ավտոռալլի» են ցանկացել անել, ինչն էլ ավարտվել է ողբերգությամբ:
Կայքի տեղեկացմամբ, մահացածներն են Կապան քաղաքի բնակիչներ Դավիթ Ավետիսյանը և Արմինե Մուսախանյանը, ով աշխատում էր Ազգային անվտանգության ծառայությունում՝ որպես գործավար։–0–