ԵՐԵՎԱՆ, 11 հունիսի./Նովոստի–Արմենիա/. Երեկ՝ հունիսի 10-ին, ողբերգական ավտովթար է տեղի ունեցել Գեղարքունիքի մարզում:
Shamshyan.com–ի հաղորդմամբ, ժամը 23:00-ի սահմաններում Երևան-Իջևան ավտոճանապարհի 51-րդ կմ հատվածում Գեղարքունիքի մարզի Սարուխան գյուղի բնակիչ 62-ամյա Արայիկ Կատվալյանն իր վարած ՎԱԶ 2106 մակնիշի ավտոմեքենայով դուրս է եկել ճանապարհի երթևեկելի գոտուց, բախվել ճանապարհի աջակողմյան հատվածում գտնվող կամրջի բետոնե արգելապատնեշին:
Վթարի հետևանքով վարորդ Ա. Կատվալյանը, նրա ուղևորը՝ համագյուղացի 22-ամյա Էլիսա Կատվալյանը քաղաքացիների օգնությամբ դուրս են բերվել ավտոմեքենայից և հոսպիտալացվել:
Վթարի հետևանքով մյուս ուղևոր 52-ամյա Մարգարիտա Խալոյանը տեղում մահացել է:
Փաստի առթիվ հարուցվել է քրեական գործ ՀՀ ՔՕ 242 հոդվածի 2-րդ մասի հատկանիշներով (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ):
Կայքի տեղեկություններով վարորդը, մահացածն ու վիրավոր ուղևորուհին ընտանիքի անդամներ են: Մահացածը վարորդի կինն էր, վիրավորը՝ աղջիկը: –0–