Ողբերգական ավտովթար Արցախում. կա 4 զոհ

ԵՐԵՎԱՆ, 26 հոկտեմբերի. /Նովոստի–Արմենիա/. Նախօրեին՝ հոկտեմբերի 25-ին, ողբերգական ավտովթար է տեղի ունեցել Արցախում։

Ժամը 10:05-ին Արցախի ԱԻՆ ահազանգ է ստացվել, որ Ասկերան-Ստեփանակերտ ճանապարհի 2-րդ կմ տեղի է ունեցել ավտոպատահար, անհրաժեշտ է փրկարարների օգնությունը, հաղորդում է shamshyan.com–ը։

Ահազանգով դեպքի վայր են մեկնել Ասկերանի շրջանային արտակարգ իրավիճակների բաժնի մեկ մարտական հաշվարկ և փրկարարական ուժերի վարչության արագ արձագանքման հատուկ ստորաբաժանման հերթապահ օպերատիվ խումբը: Տեղ հասնելուց պարզվել է, որ միմյանց են բախվել Ասկերան քաղաքի բնակի, 35-ամյա Ռ. Ս.-ի վարած ՎԱԶ 21011 մակնիշի, Շուշիի շրջանի Քարին Տակ համայնքի բնակիչ 23-ամյա Մ. Թ.-ի վարած Mitsubishi մակնիշի և Մարտունու շրջանի Հացի համայնքի բնակիչ 33-ամյա Ս. Ղ.-ի վարած ՎԱԶ 2106 մակնիշի ավտոմեքենաները:

Վթարի հետևանքով ՎԱԶ 21011 մակնիշի ավտոմեքենայի վարորդ Ռ. Ս.-ն և ուղևորները՝ Ասկերանի բնակիչ, 29-ամյա Հ. Ս.-ն, Ասկերանի բնակիչ, 51-ամյա Ա. Ս.-ն տեղում մահացել են, իսկ Ասկերանի բնակիչ 58-ամյա Ի. Ս.-ին տեղում ցուցաբերել են առաջին բուժօգնություն և տեղափոխել «Հանրապետական բժշկական կենտրոն» ՓԲԸ, որտեղ վերջինս մահացել է:

Mitsubishi մակնիշի ավտոմեքենայի վարորդ Մ. Թ.-ին տարբեր աստիճանի մարմնական վնասվածքներով տեղափոխել են «Հանրապետական բժշկական կենտրոն» ՓԲԸ: Ըստ բժիշկներից ստացած տեղեկության` տուժածի վիճակը գնահատվում է բավարար:

ՎԱԶ 2106 ավտոմեքենայում տուժածներ չկան:–0–