Վայոցձորցին ընկերներին «տնական» մարիխուանա է հյուրասիրել

ԵՐԵՎԱՆ, 15 փետրվարի. /Նովոստի–Արմենիա/. Վայոցձորցի 29–ամյա Զավեն Գրիգորյանը մեղադրվում է կանեփից մարիխուանա պատրաստելու և իրացնելու մեջ։

 «Գրիգորյանը 2014թ. հոկտեմբեր ամսին Վայոց Ձորի մարզի Խաչիկ գյուղի վարչական տարածքում գտնվող «Ձոր» կոչվող վայրից, նկատելով վայրի աճած կանեփի բույս, դրա թփի տերևները քաղել է, հետագայում ծածկի տակ փռելու եղանակով չորացրել է, մանրացրել և իր անձնական գործածման համար, առանց իրացնելու նպատակի, ապօրինի պատրաստել է մարիխուանա տեսակի թմրամիջոց, որի մի մասն օգտագործել է, իսկ մնացած մասը փաթաթել է թղթի մեջ և ապօրինի պահել է գյուղի կիսաքանդ խանութի տանիքում»,-ասված է Դատական տեղեկատվական համակարգի հաղորդագրությունում:

Հաղորդագրության համաձայն, Գրիգորյանը 2015թ. ապրիլի 25-ին իր կողմից ապօրինի պահված մարիխուանա տեսակի թմրամիջոցը լցրել է ծխախոտի գլանակի մեջ և հյուրասիրել իր համագյուղացի ընկերներին՝ Արթուր Աբրահամյանին և Արսեն Հայրապետյանին:

Զավեն Գրիգորյանին առաջադրվել է մեղադրանք ՀՀ ՔՕ 266–րդ հոդվածի առաջին մասի հատկանիշներով (իրացնելու նպատակով թմրամիջոցներ կամ հոգեներգործուն նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը կամ դրանք ապօրինի իրացնելը)։–0–