Սիրահարի «մուրազը փորը մնաց». Երևանում «աղջիկ փախցնելու օպերացիա է» կանխվել

ԵՐԵՎԱՆ, 16 մարտի. /Նովոստի–Արմենիա/. Այսօր՝ մարտի 16-ին, արտակարգ դեպք է տեղի ունեցել Երևանում։

Shamshyan.com–ի հաղորդմամբ, ժամը 10։45-ի սահմաններում ոստիկանության Շենգավիթի բաժին ահազանգ է ստացվել, որ Նոր Նորք վարչական շրջանից դեպի Շենգավիթի վարչական շրջան է ընթանում ՎԱԶ 21014 մակնիշի ավտոմեքենա։

Ոստիկանները ահազանգ են ստացել, որ նշված ավտոմեքենայով մարդ են առևանգել։

Արդեն Շենգավիթ վարչական շրջանում Շենգավիթի ոստիկանները կարողացել են ճիշտ և օպերատիվ գործողությունների ընթացքում կանգնեցնել նշված ավտոմեքենայի վարորդին, ում տեղափոխել են Շենգավիթի ոստիկանության։

Պարզվել է, որ մինչ այդ նա իր ավտոմեքենայով բախվել է Նոր Նորքի 9-րդ զանգվածի բնակիչ, 36-ամյա Գալուստ Համբարձումյանի վարած Mercedes մակնիշի ավտոմեքենային։

Ըստ նախնական տեղեկությունների՝ զոհեր և վիրավորներ չկան։

Այս պահին ոստիկանության Շենգավիթի բաժնի հետաքննչական բաժանմունքի հետաքննիչը ավտոմեքենաների զննություն է կատարում։

Փաստի առթիվ Շենգավիթի հետաքննչական բաժանմունքի հետաքննիչ Նորայր Մարգարյանի կողմից նյութեր են նախապատրաստվում։

Կայքի տեղեկություններով՝ աղջկան առևանգողը եղել է Երևան քաղաքի Ֆուչիկի 2-րդ նրբանցքի բնակիչ, 25-ամյա Գարիկ Դանիելյանը։

Կայքի հետ զրույցում վերջինս ասում էր, որ աղջկան փախցնում էր ընկերոջ համար, սակայն անավարտ մնաց։ Իսկ Mercedes-ը վնասվել է, քանի որ աղջիկը ընթացքում մեքենայի դուռը բացել է և այն կպել է Mercedes-ին։–0–