ԵՐԵՎԱՆ, 23 հոկտեմբերի. /Նովոստի–Արմենիա/. Քիչ առաջ դաժան ու սահմռկեցուցիչ դեպք է տեղի ունեցել Գեղարքունիքի մարզում։
Shamshyanc.com-ի հաղորդմամբ, Գեղհովիտ գյուղի վարչական տարածքում գտնվող գերեզմանոցում նույն գյուղի բնակիչ 43-ամյա Սմբատ Ըռքոյանը թաղման ժամանակ մոտեցել է թաղման մասնակից, համագյուղացի 45-ամյա Արսեն Մկրտչյանին և իր մոտ եղած դանակով կտրել նրա պարանոցը։
Ա. Մկրտչյանը ծայրահեղ ծանր վիճակով տեղափոխվել է Մարտունու բժշկական կենտրոն, որտեղ առաջին բուժօգնությունը ստանալուց հետո տեղափոխվել է Երևան։
Փաստի առթիվ հարուցվել է քրեական գործ ՀՀ ՔՕ 34-104 հոդվածի 1-ին մասի (սպանության փորձ) հատկանիշներով։
Կայքի հաղորդմամբ, մինչ ոստիկաններն ու քննիչները կվնասազերծեին կասկածյալին, նա իր մոտ եղած հանցագործության գործիք հանդիսացող դանակով ինքնավնասում է կատարել ձեռքի դաստակի հատվածում։ Նա նույնպես տեղափոխվել է Մարտունու բժշկական կենտրոն։ Հայտնաբերվել է հանցործության գործիք հանդիսացող դանակը։–0–