Ռուսաստանաբնակ 55–ամյա հայը դատվում է Նիժնի Նովգորոդում բռնաբարության փորձի համար

ԵՐԵՎԱՆ, 12 դեկտեմբերի. /Նովոստի-Արմենիա/. Նիժնի Նովգորոդում 55-ամյա հայը կդատվի բռնաբարության փորձի և մի քանի գողությունների համար, հաղորդում է «Օտկռիտի Նիժնի» հարթակը` հղում անելով Նիժնի Նովգորոդի քննչական վարչությանը:

Առկա տվյալների համաձայն, 2016 թ.-ի հոկտեմբերի 5-ին հայազգի տղամարդը Սվետլոգորսկայա փողոցում հարձակվել է կին անցորդի վրա: Նա բռնել է կնոջ վզից, տապալել գետնին և, սպառնալով սպանել, փորձել է բռնաբարել: Սակայն կինը դիմադրել է և ճանկռել տղամարդուն:

Զայրացած տղամարդը բռունցքներով հարվածել է կնոջ դեմքին: Վերջինիս գոռոցների վրա արձագանքել են անցորդները: Տղամարդը վերցրել է կնոջ պայուսակը և փախուստի դիմել:

Նույն օրը նա գողություն է կատարել նաև Նարտովի փողոցում գտնվող վարսավիրանոցից: Գողոնը կազմել է 9,5 հազար ռուբլի:

Ձերբակալված օտարերկրացու նկատմամբ հարուցվել է քրեական գործ «բռնաբարության փորձ` սպանության սպառնալիքով», «ավազակություն` առողջության և կյանքի համար վտանգավոր բռնության կիրառմամբ» և «կողոպուտ` քաղաքացուն զգալի չափի վնասի պատճառմամբ» հատկանիշներով: Կասկածյալն իր մեղքն ընդունել է:

Քրեական գործի մեղադրական եզրակացությունն արդեն հաստատվել է, առաջիկայում կսկսվի դատավարությունը: -0-