ԵՐԵՎԱՆ, 7 հունիսի. /Նովոստի-Արմենիա/. ԵՔՔՎ Ավան և Նոր Նորք վարչական շրջանների քննչական բաժնում քննություն է տարվում՝ քաղաքացու նկատմամբ կատարված ավազակային հարձակման բոլոր հանգամանքները պարզելու ուղղությամբ:
Ինչպես հայտնում է ՀՀ քննչական կոմիտեի մամուլի ծառայությունը, 2019թ.-ի հունիսի 5-ին 1985 թվականին ծնված քաղաքացին հաղորդում է տվել այն մասին, որ նույն օրը՝ ժամը 18:30-ի սահմաններում, Երևան քաղաքի զբոսայգիներից մեկում անծանոթ տղամարդը հարձակվել է իր վրա, պոկել ոսկյա շղթան ու խաչը և դիմել փախուստի, սակայն ինքը հետապնդել է առերևույթ հանցագործություն կատարած անձին և վերադարձրել գողոնը:
«Դեպքի առթիվ ՀՀ ՔԿ ԵՔՔՎ Ավան և Նոր Նորք վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 1-ին (Ավազակությունը՝ ուրիշի գույքը հափշտակելու նպատակով հարձակումը, որը կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով) մասով: 1985 թվականին ծնված քաղաքացին ճանաչվել է տուժող», - նշվում է տարածած հաղորդագրությունում:
Նախաքննության ընթացքում ձեռնարկված անհետաձգելի քննչական, օպերատիվ-հետախուզական միջոցառումների արդյունքում պարզվել է առերևույթ հանցագործություն կատարած անձի ինքնությունը, ով հանդիսանում է Երևան քաղաքի բնակիչ՝ ծնված 1973 թվականին: Վերջինս ավազակային հարձակում կատարելու կասկածանքով ձերբակալվել է:
Քրեական գործի համար էական նշանակություն ունեցող մի շարք հանգամանքներ պարզելու համար նշանակվել է դատաբժշկական փորձաքննություն: Նախաքննությունը շարունակում է:-0-