Փրկարարներն ապամոնտաժել են երևանյան «Պիզայի աշտարակը» (ՖՈՏՈ)

ԵՐԵՎԱՆ, 21 հունիսի./Նովոստի-Արմենիա/ Արտակարգ պատահար է տեղի ունեցել նախօրեի երեկոյան Երևանում:

Ինչպես տեղեկացնում է ՀՀ արտակարգ իրավիճակների նախարարության մամուլի ծառայությունը, հունիսի 20-ին, ժամը 19:57-ին ահազանգ է ստացվել, որ Երևան քաղաքի Դավիթ Անհաղթ փողոցի թիվ 10 հասցեում՝ Հայաստանում ֆրանսիական համալսարանի մոտ գտնվող չգործող կաթսայատան ծխատարը թեքվել է, առկա է ընկնելու վտանգ. անհրաժեշտ է փրկարարների օգնությունը:

Դեպքի վայր են մեկնել Ճգնաժամային կառավարման ազգային կենտրոնի օպերատիվ խումբը, հատուկ նշանակության փրկարարական աշխատանքների իրականացման կենտրոնի փրկարարական ջոկատը, մեկ մարտական հաշվարկ և ավտոսանդուղքը:

Պարզվել է, որ չգործող կաթսայատան ծխատարը (մոտ 30մ բարձրությամբ և 1մ տրամագծով) թեքվել է, առկա է ընկնելու վտանգ. անհրաժեշտ է ապամոնտաժել:

Դեպքի վայրում են գտնվել ՀՀ ԱԻ նախարար Դ. Տոնոյանը, այլ պաշտոնատար անձիք:

Ապամոնտաժման աշխատանքներն իրականացնելու համար Երևանի քաղաքապետարանի կողմից տրամադրվել է վերամբարձ կռունկ:

shamshyan.com կայքի հաղորդմամբ, փրկարարները դժվարությամբ են իրականացրել աշխատանքները ՝ հաշվի առնելով ծխատարի ընկնելու վտանգը: Թեքված ծխատարը, որը լուրջ վտանգ է ներկայացրել, հազիվ կախված է մնացել է մի քանի ճոպաններից, որոնցից երկուսը պոկվել էին, իսկ հիմքն ամբողջովին խարխուլ է եղել: Այն կառուցվել է ԽՍՀՄ տարիներին և անորակ է եղել:

Կայքի հաղորդմամբ` հավաքվածներըտեսնելով, թե ինչպես են փրկարարները ճոպաններով մագլցում թեքված ծխատարի վրայով, կատակել են՝ ասելով. «Մինչ իտալացիները հպարտանում են իրենց Պիզայի աշտարակով, մենք մերն ենք անվտանգ ապամոնտաժում, հակառակ դեպքում եթե նա ընկներ, հետևանքները կարող էին նաև ողբերգական լինեին, քանի որ հարևանությամբ կա և՛ դպրոց, և՛ համալսարան, և՛ բազմաբնաակարանային բնակելի շենք»:

Փրկարարները ծխատարն անվտանգ իջեցրել են (ապամոնտաժել) ժամը 02:30-ին:-0-