ԵՐԵՎԱՆ, 21 ապրիլի./Նովոստի–Արմենիա/. Մի քանի ժամ առաջ փոխհրաձգություն է տեղի ունեցել Փարիզի Ելիսեյան դաշտերի մոտակայքում։
Ինչպես հաղորդում է
ՏԱՍՍ–ը, հղում անելով BFMTV հեռուստաալիքին, փոխհրաձգության հետևանքով մի ոստիկան սպանվել է, ` վիրավորվել։
Ֆրանսիական ոստիկանությունը դիտարկում է ահաբեկչության վարկածը։
Փոխհրաձգության հետևանքով նաև պատահական անցորդ է վիրավորվել։ Հանցագործներից մեկը ոչնչացվել է, ոստիկանությունը փնտրում է նրա հնարավոր հանցակցին։
Ինչպես հաղորդում է Reuters–ը, փոխհրաձգությունը գրանցվել է Marks&Spencer խանութի մոտակայքում։ Այս պահին անհայտ է` արդյոք հանցագործներից որևէ մեկը գտնվու՞մ է առևտրի սրահում, թե ոչ։ BFMTV–ի հաղորդմամբ, մի մարդ պառկած է գետնին։
Հեռուստաալիքի տվյալներով, հանցագործը «զինված է եղել բանակային զենքով, հնարավոր է` Կալաշնիկով տեսակի ավտոմատով։ Գրանցվել է բավականին կատաղի փոխհրաձգություն»։
«Վկաներից մի քանիսը նշում են, որ հանցագործը միայնակ չի եղել», – տեղեկացնում է BFMTV–ին։
Ֆրանսիայի ոստիկանությունը խոշոր օպերացիա է սկսել Ելիսեյան դաշտերի մոտակայքում` իրավիճակը վերահսկելու նպատակով։
Այս պահին Ելիսեյան դաշտերին հարակից տարածքը փակ է։
«Դեպքի վայր են ժամանել ավելի քան 30 ավտոբուսներ` հատուկ ստորաբաժանումների մարտիկներով, այդ թվում` RAID ստորաբաժանումը, որը զբաղվում է ահաբեկչության դեմ պայքարով։ Երկնքում բազմաթիվ ուղղաթիռներ կան», – հաղորդում է France Info ռադիոկայանը։
Reuters–ն իր հերթին, հղում անելով ոստիկանության երեք աղբյուրներին, հաղորդում է, որ միջադեպը կարող էր զինված կողոպուտի փորձ լինել։–0–