Կրակոցներ Երևանի գերեզմանատներից մեկում. կրակողը հայտնաբերվել է, տուժածին փնտրում են

ԵՐԵՎԱՆ, 19 հուլիսի./Նովոստի–Արմենիա/. Արտակարգ դեպք է տեղի ունեցել նախօրեին Երևանում

Shamshyan.com–ի հաղորդմամբ, երեկ՝ հուլիսի 18-ին ոստիկանները, իրացնելով օպերատիվ տվյալներ, պարզել են, որ Երևանի բնակիչ Արամ Բաբալյանը նույն օրը ժամը 15։00-ի սահմաններում հրազենային վնասվածքներ է ստացել մայրաքաղաքի գերեզմանատներից մեկում։

Կայքի հաղորդմամբ, Բաբալյանի ուղղությամբ կրակոցներ է արձակել Երևան քաղաքի Ջրաշենի 1-ին փողոցի բնակիչ 41-ամյա Ազատ Պետրոսյանը։

Ոստիկանությունը հայտնաբերել է Պետրոսյանին, ով խուլիգանություն կատարելու կասկածանքով բերման է ենթարկվել ոստիկանության Էրեբունու բաժին, որտեղ էլ բացատրություն տալուց հետո ազատ է արձակվել։

Ոստիկանությունը ձեռնարկում է օպերատիվ-հետախուզական միջոցառումներ տուժած Բաբալյանին հայտնաբերելու ուղղությամբ։ Փաստի առթիվ նյութեր են նախապատրաստվում։–0–