Խոշոր ու ողբերգական ավտովթար Սյունիքի մարզում. հայր ու որդի մահացել են, կա վիրավոր

ԵՐԵՎԱՆ, 18 հունվարի. /Նովոստի Արմենիա/. Այսօր՝ հունվարի 18-ին, խոշոր ու ողբերգական ավտովթար է տեղի ունեցել Սյունիքի մարզում։

Ինչպես հայտնում է shamshyan.com-ը, ժամը 09։20-ի սահմաններում Սիսիան-Շաքի ավտոճանապարհին բախվել են ՎԱԶ 2107 մակնիշի և Ուռալ մակնիշի ավտոմեքենաները։

Վթարի հետևանքով «07»-ում գտնվող Արշակ Հովհաննիսյանն ու Մարտիկ Հովհաննիսյանը մահացել են, իսկ մյուս ուղևորը՝ էլմիրա Սարգսյանը, մարմնական վնասվածքներով տեղափոխվել է Սիսիանի բժշկական կենտրոն։

Ինչպես հայտնում է աղբյուրը, փաստի առթիվ հարուցվել է քրեական գործ ՀՀ ՔՕ 242 հոդվածի 3-րդ մասի (ճանապարհատրանսպորտային պատահար, որն անզգուշությամբ առաջացրել է 2 և ավելի մարդու մահ) հատկանիշներով։

Ըստ կայքի տեղեկությունների, վթարի մեղավորը եղել է «07»-ի վարորդը, ով դուրս է եկել հանդիպակաց երթևեկելի գոտի և ճակատային մասով բախվել Ուռալին, որը հաշվառված է ՀՀ ՊՆ հաշվեկշռում, այն զինվորներ էր տեղափոխվում։

Նշվում է նաև, որ զինվորները չեն տուժել, նրանք մեկ այլ ավտոմեքենայով տեղափոխվում են զորամաս։

Ինչպես հայտնում է shamshyan.com-ը, մահացածները հայր ու որդի էին։ -0-