Խոշոր ավտովթար Երևանում. բախվել են 4 մեքենաներ, որոնցից մեկը` բեռնատար. կան վիրավորներ

ԵՐԵՎԱՆ, 8 հոկտեմբերի. /Նովոստի–Արմենիա/. Նախօրեին երեկոյան խոշոր ավտովթար է գրանցվել Երևանում։ 

ՀՀ ԱԻՆ Փրկարար ծառայության հաղորդմամբ, հոկտեմբերի 7-ին, ժամը 18:15-ին տեղեկություն է ստացվել, որ Երևան քաղաքի Հյուսիսային ավտոկայանի մոտակայքում տեղի է ունեցել ՃՏՊ, բախվել են ավտոմեքենաներ, կա տուժած, անհրաժեշտ է փրկարարների օգնությունը:


Դեպքի վայր են մեկնել մեկ մարտական հաշվարկ և Հատուկ նշանակության փրկարարական աշխատանքներ իրականացնող կենտրոնի փրկարարական ջոկատը:

«Պարզվել է, որ Մ-4 ավտոճանապարհի Երևան–Սևան հատվածի 2-րդ կմ-ին բախվել են «Opel Astra J» մակնիշի (վարորդ՝ Ն. Ո.), «Mitsubishi» մակնիշի բեռնատար  (վարորդ՝ Մ. Ն.), «Volkswagen Golf» մակնիշի (վարորդ՝ Ա. Թ.) և «Volkswagen Golf» մակնիշի 3 (վարորդի տվյալները չի հաջողվել պարզել)  ավտոմեքենաները», – նշվում է հաղորդագրության մեջ։ 

Մինչ փրկարարների՝ կանչի վայր հասնելը «Opel Astra J» մակնիշի ավտոմեքենայի ուղևոր՝ 1996 թ. ծնված Վ. Խ.-ը տեղի ուժերով դուրս է բերվել ավտոմեքենայից, ում փրկարարները մոտեցրել են շտապօգնության ավտոմեքենային: Վ. Խ.-ը հոսպիտալացվել է «Հերացի» թիվ 1 համալսարանական հիվանդանոց, որտեղ բժիշկները տուժածի առողջական վիճակը գնահատել են կայուն ծանր:

Փրկարարները փակել են ավտոմեքենաների գազի բալոնների փականները և հոսանքազրկել «Opel Astra J» մակնիշի ավտոմեքենան: