Հայտնաբերվել են նախորդ տարի Երևանի բուքմեյքերական գրասենյակներից մեկի վրա զինված հարձակում կատարած եղբայրները (ՏԵՍԱՆՅՈւԹ)

ԵՐԵՎԱՆ, 6 հոկտեմբերի. /Նովոստի–Արմենիա/. 2015 թվականի հոկտեմբերի 25-ին, ժամը 23.40-ի սահմաններում, անհայտ անձինք մտել էին մայրաքաղաքի Մովսես Խորենացու փողոցում գտնվող բուքմեյքերական ընկերության գրասենյակ, հրազենային վնասվածքներ հասցրել այնտեղ գտնվող չորս մարդու և դիմել փախուստի:

Փաստի առթիվ հարուցվել էր քրեական գործ, հաղորդում է ոստիկանության մամուլի ծառայությունը։

Նախաքննության ընթացքում պարզվել էր կասկածյալների անձը` Գևորգ և Հենրիկ Բաղդասարյաններ, որոնք որոշ շրջանակներում հայտնի են «Կաբելի տղերք» մականվամբ:

Որոշում է կայացվել նրանց որպես մեղադրյալ ներգրավելու մասին:

Նույն թվականի հոկտեմբերի 28-ին նրանց նկատմամբ հայտարարվել էր հետախուզում` որպես խափանման միջոց ընտրելով կալանավորումը:

2016 թվականի հոկտեմբերի 6-ին, ոստիկանության ծառայողների ձեռնարկած օպերատիվ-հետախուզական միջոցառումների արդյունքում, նրանք հայտնաբերվել են Երևանի Ծիծեռնակաբերդի խճուղում գտնվող մի շինությունում և բերման ենթարկվել:–0–