Գողություն է կատարվել ՔԿ նախկին նախագահ Աղվան Հովսեփյանի առանձնատնից

ԵՐԵՎԱՆ, 1 հուլիսի./Նովոստի–Արմենիա/. ՀՀ ՔԿ Արագածոտնի մարզային քննչական վարչությունում հարուցվել է քրեական գործ՝ Բյուրականում գտնվող, Նարեկ Հովսեփյանին պատկանող տնից կատարված գողության դեպքի առթիվ, հաղորդում է ՀՀ ՔԿ մամուլի ծառայությունը

Նախնական տվյալներով` 2018 թվականի հունիսի լույս 28-ի գիշերն անհայտ անձը, տեխնիկական միջոցների գործադրմամբ, պոկել է Արագածոտնի մարզի Բյուրական համայնքում գտնվող, Ն.Հովսեփյանին պատկանող տան առաջին հարկի պատուհանի մետաղյա ճաղավանդակը, կոտրել պատուհանը, ապօրինի մուտք գործել ներս, տակնուվրա արել բոլոր դարակները, տունը և հափշտակելով սիգարներ ու մեկ հատ հուշանվեր-թուր՝ դիմել փախուստի:

Հայկական ԶԼՄ–ների հաղորդմամբ, տունը պատկանում է ՀՀ քննչական կոմիտեի նախկին նախագահ Աղվան Հովսեփյանին, սակայն գրանցված է նրա որդու անունով։–0–