Գերեզմանատան մոտ զենք-զինամթերք է հայտնաբերվել

ԵՐԵՎԱՆ, 11 փետրվարի./Նովոստի–Արմենիա/. Երևանի գերեզմանոցներից մեկում զենք–զինամթերք է հայտնաբերվել։

ՀՀ ոստիկանության հաղորդմամբ`ոստիկանության Երևան քաղաքի վարչության ՊՊԾ գնդի 4-րդ գումարտակի ծառայողների բացատրական աշխատանքների շնորհիվ՝ փետրվարի 9-ին, ժամը 14-ին, նույն գումարտակի ծառայողներից մեկին է զանգահարել մի քաղաքացի և հայտնել, որ ռազմամթերք ունի և դրանք թողնում է «Շահումյան» գերեզմանատան մուտքի հարակից տարածքում:

Մեկնած օպերատիվ խումբը Երևանի Հասրաթյան փողոցի թիվ 7 հասցեի հարակից տարածքում հայտնաբերել է մեծ քանակությամբ զենք–զինամթերք, մասնավորապես` հակատանկային ական` պայթուցիչով, ինքնաշեն 2 նռնակ, նռնակի 5 պայթուցիչ, լուսաձայնային 20 փամփուշտ, 2 հատ «Չերյոմուխա-12», «Ֆ-1» տիպի 1 նռնակ, 1 ծխային նռնակ, «Կալաշնիկով» տիպի ինքնաձիգի 2 պահունակ, 5,45 մմ տրամաչափի 124 և 7,62 մմ տրամաչափի 39 փամփուշտ: 

Նշանակվել է փորձաքննություն:–0–