Արտակարգ դեպք Երևանում․ հարևանների վեճն ավարտվել է կրակոցով․ վնասվել է 53-ամյա տղամարդու աչքը

ԵՐԵՎԱՆ, 6 մարտի./Նովոստի–Արմենիա/. ՀՀ ոստիկանության Էրեբունու բաժնի հետաքննչական բաժանմունքում հետաքննություն է սկսվել մարտի 4-ին,Երևանում տեղի ունեցած կրակոցի փաստով։

Shamshyan.com-ի հաղորդմամբ, ժամը 12։30-ի սահմաններում Երևանի 1-03 շտապօգնության թիվ 03 բժշկական խումբը ահազանգել է ոստիկանության Երևան քաղաքի վարչության օպերատիվ կառավարման կենտրոն, որ«ձախ ակնակապիճի միջին շրջանի հրազենային վնասվածք» ախտորոշմամբ «Սուրբ Գրիգոր Լուսավորիչ» բժշկական կենտրոն են տեղափոխել մի քաղաքացու։

Պարզվել է, որ վիրավորը Ռոստոմի փողոցի 80 տան բնակիչ, 53-ամյա Խաչիկ Վանյանն է։

Կայքի տեղեկություններով, այդ օրը ժամը 12։00-ի սահմաններում նա իր տան տանիքի ձյունը մաքրելիս է եղել, երբ, ըստ իր հայտարարության, հարևանը՝ 42-ամյա Արթուր Մաթևոսյանը, վիճաբանել է իր հետ, որի ժամանակ էլ իրեն պատկանող օդամղիչ ատրճանակով կրակել է իր աչքին։

Աղբյուրի տեղեկություններով, Էրեբունու ոստիկաններն արդեն հայտնաբերել են Ա․ Մաթևոսյանին, ով ներկայացրել է նաև թիվ ММ-24897 համարի օդամղիչ ատրճանակը: Նշանակվել են դատաբժշկական և դատաձգաբանական, դատահետքաբանական, մատնադրոշմային փորձաքննություններ։–0–