ԱԻՆ-ը ներկայացնում է «Մալաթիա մոլ»-ում բռնկված հրդեհի հետևանքները (ՖՈՏՈ, ՎԻԴԵՈ)
10:30
26 Օգոստոսի 2019
ԵՐԵՎԱՆ, 26 օգոստոսի. /Նովոստի-Արմենիա/. ՀՀ ԱԻՆ-ը տեղեկություն է ներկայացրել շաբաթ օրը «Մալաթիա մոլ»-ում բռնկված խոշոր հրդեհի հետևանքների մասին:
Պարզվել է, որ հրդեհը բռնկվել էր Երևան քաղաքի Սեբաստիայի փողոցի թիվ 145/5 հասցեում գտնվող «Վեգա-Ուորլդ» ՍՊԸ-ի տարածքում:
Հրդեհի հետևանքով «Վեգա-Ուորլդ» ՍՊԸ-ի շենքի նկուղային հարկում (մոտ 8000 քմ) այրվել են փայտամշակման հաստոցներ և լամինատ, 1-ին հարկում (մոտ 11.000 քմ)` լամինատ, կենցաղային տեխնիկա և կահույք, 2-րդ (մոտ 5000 քմ) և 5-րդ (մոտ 6000 քմ) հարկերում` կահույք:
Օգոստոսի 24-ին, ժամը 15:47-ին «911» ծառայությանն ահազանգ է ստացվել, որ Երևան քաղաքի Սեբաստիա փողոցում գտնվող «Մալաթիա մոլ»-ի շենքում հրդեհ է բռնկվել, կան տուժածներ: Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից վեց մարտական հաշվարկ, երկու ավտոսանդուղք, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը, ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը, ինչպես նաև հոգեբանական աջակցության բաժնի հոգեբանական խորհրդատվության գծով հրահանգիչը:
Ինչպես հայտնել էր «Նովոստի-Արմենիա» գործակալության թղթակիցը, «Մալաթիա մոլ» առևտրի կենտրոնում բռնկված խոշոր հրդեհի բարդությունը 2 «Բիս»-ից բարձրացվել է 3 «Բիս»:
Կրակը տարածվել է 8 արտադրամասերում, որոնցից յուրաքանչյուրի մակերեսը կազմում է մոտ 800 քմ: Ինչպես հայտնում էր գործակալության թղթակիցը, ԱԻՆ ներկայացուցիչները հերքեցին պայթյունավտանգ նյութերի առկայությունը, սակայն հրավտանգ նյութերի մեծ քանակության պատճառով հրդեհի տեղայնացումը դժվարանում է:
Առողջապահության նախարարության տվյալներով, Մալաթիայում տեղի ունեցած հրդեհի հետևանքով տուժել է 10 քաղաքացի։
«Նրանցից 8-ը գտնվել են «Աստղիկ» բժշկական կենտրոնում, 2-ը՝ Հանրապետական հիվանդանոցում։ Բոլորը դուրս են գրվել»,- հայտնում է ԱՆ մամուլի խոսնակ Ալինա Նիկողոսյանը:
«Մալաթիա մոլ» առևտրի կենտրոնը, որը գտնվում է Մալաթիա-Սեբաստիա վարչական շրջանում, սկսել է գործել 2016 թվականին: Կենտրոնը պատկանում է նախկին պատգամավոր, գործարար Սամվել Ալեքսանյանին, ում պատկանում է նաև Yerevan City սուպերմարկետների ցանցը: -0-