ԵՐԵՎԱՆ, 4 հունվարի./Նովոստի–Արմենիա/. Ղազախստանում ՀՀ դեսպանատունը հանդես է եկել հայտարարությամբ Կարագանդա քաղաքում ողբերգական միջադեպի կապակցությամբ, ինչի հետևանքով տղամարդ է մահացել։
«Ստացված տվյալներով, հունվարի 1–ի գիշերը Կարագանդա քաղաքի «Հին Հռոմ» ռեստորանում կենցաղային հողի վրա տեղի է ունեցել ծեծկռտուք ռեստորանի այցելուների միջև, ինչի հետևանքով տղամարդ է մահացել, երեք մարդ վիրավորվել է», – նշվում է դիվանագիտական առաքելության հայտարարության մեջ, որը տարածել է ՀՀ ԱԳՆ մամուլի ծառայությունը։
«Խորապես սգում ենք ողբերգական միջադեպի կապակցությամբ, ինչը մարդկային կյանք է խլել։ Մեր ցավակցությունն ենք հայտնում զոհվածի հարազատներին և մտերիմներին։ Վստահ ենք, որ քննության արդյունքում կպարզվեն միջադեպի բոլոր հանգամանքները, բոլոր մեղավորները կգտնվեն և կկրեն պատիժ օրենքի շրջանակում», – նշվում է Ղազախստանում ՀՀ դեսպանատան հայտարարության մեջ։
Դիվանագիտական առաքելությունից նաև ընդգծում են, որ Ղազախստանը բազմազգ պետություն է, որտեղ ավանդաբար իշխում է ազգամիջյան համաձայնություն և բացարձակ հանդուրժողականություն էթնիկ փոքրամասնությունների նկատմամբ։
«Հույս ունենք, որ զանգվածային լրատվության միջոցները կհիմնվեն պաշտոնական աղբյուրների վրա և սոցցանցերում չեն տարածի ոչ ստույգ տեղեկատվություն, որը կարող է դառնալ հանրային կարծիքի մանիպուլյացիայի աղբյուր և այս ողբերգությանը կարող է հաղորդել ազգամիջյան հիմքի վրա հենված հակամարտության երանգ», – նշվում է հայտարարության մեջ։
Ղազախական ԶԼՄ–ների հաղորդմամբ, փաստի առթիվ իրականացվում է նախաքննություն ՔՕ 99–րդ հոդվածի 1–ի մասին հատկանիշներով (սպանություն)։ Zakon.kz կայքի տեղեկատվությամբ, օպերատիվ–հետախուզական միջոցառումների արդյունքում ոստիկանները ձերբակալել են երեք տղամարդու` Մալխասյան Թորգոմ, Մալխասյան Սոխակ, Նադիրբեկով Կաիր։ Նրանք կասկածվում են ծանր հանցագործություն կատարելու մեջ, Կարագանդայի դատարանը նրանց նկատմամբ որպես խափանման միջոց ընտրել է կալանքը։ Կարագանդայի ոստիկանների կողմից հետախուզում է հայտարարվել Գուրուրյան Նարեկի նկատմամբ։–0–