ԵՐԵՎԱՆ, 15 հուլիսի. /Նովոստի-Արմենիա/. Հայտնի են դարձել Վրաստանի հայաբնակ Վաչիան գյուղում հայ ընտանիքի սպանության դրդապատճառները, գրում է «Իրավունք» թերթը:
Քաչոտյանների ընտանիքը` 37-ամյա մայր Օֆելիան, երկու դստրեր 18-ամյա Ասյան ու 16-ամյա Արմինեն և 5-ամյա որդի Սերգեյը, զոհվել են իրենց տանը, ենթադրաբար, գողության ժամանակ: Ըստ առկա տվյալների` ընտանիքի հայրը մեկնել է Ռուսաստան արտագնա աշխատանքի:
Հանցագործության մեջ մեղադրվում է տեղի բնակիչ 23-ամյա Նոդար Ակոպովը:
ՀՀ ԱԳՆ–ն հաստատում է Ախալքալաքում հայկական ընտանիքի սպանության մեջ կասկածվողի ձերբակալման տեղեկատվությունը>>
Վրաստանի հայազգի պատգամավոր Սամվել Պետրոսյանի խոսքով, նախնական վարկածով, մարդասպանը տուն է մտել գողության նպատակով, քանի որ բավականին պարտքեր է ունեցել։ Նա նշել է, որ սկզբում շրջանառվում էր նաև բռնաբարության վարկածը, սակայն այն, կարծես թե, բացառվել է։
«Ախր ոճրագործը վատ հարաբերությունների մեջ էլ չի եղել այդ ընտանիքի հետ։ Թե ի՞նչն է խելքին բրդել նման ոճրագործություն կատարել, փորձում է հասկանալ ողջ գյուղը։ Ասում են, որ նա գողության պահին պարզապես խուճապի է մատնվել, երբ տանտիրուհին ճանաչել է նրա ձայնը», - նշել է Պետրոսյանը:
Վրաստանում հայկական ընտանիքի սպանության վայրից տեսանյութ է հրապարակվել>>
Ինչպես հայտնում է «Հայկական ժամանակ» թերթը, հղում անելով Վրաստանի պատագամավոր Հենզել Մկոյանին, Քաչոտյանների ընտանիքի սպանության գործով նշանակվել է 70-ից ավելի փորձաքննություն: Քննությունը տանում են Վրաստանի ամենալուրջ քննիչները: Սույն գործը Վրաստանի իրավապահները քննում են՝ նկատի ունենալով սպանության հատկապես երեք վարկածներ՝ գողությունը, բռնաբարությունը և վրեժխնդրությունը:
«Ես երեկ երկու ժամ գյուղում էի: Այնտեղի բնակիչները ասում էին, որ երեքից ավել մարդիկ են եղել, մի հոգին այսքան բան չէր կարող անել», - նշել է Մկոյանը: Նա վստահություն է հայտնել, որ փորձաքննության արդյունքները հայտնի լինելուն պես ամեն ինչ արդեն պարզ կլինի և իրականությունը շուտով պարզ կդառնա:
Նա տեղեկացրել է, որ Նոդար Ակոպովին մեղադրանք է առաջադրվել մեկից ավելի անձանց սպանության համար: Նա ինքնախոստովանական ցուցմունք է տվել: Պատգամավորը նշել է, որ համագյուղացիների կարծիքով, Ակոպովը թմրամոլ էր և հարբեցող: -0-