Երևանում պատանի իրանցի մարզիկներ են հոսպիտալացվել` թունավորման ախտանշաններով

ԵՐԵՎԱՆ, 24 հունիսի. /Նովոստի-Արմենիա/. «Նորք» ինֆեկցիոն հիվանդանոց է հոսպիտալացվել Իրանի Իսլամական Հանրապետության 5 քաղաքացի` 11-13 տարեկան երեխաներ:

Նրանք հիվանդանոց են տեղափոխվել շտապօգնության ծառայության միջոցով` թունավորման ախտանշաններով:

Ինչպես հաղորդում է Առողջապահության նախարարության մամուլի ծառայությունը, բոլոր երեխաների մոտ եղել է սրտխառնոց, փսխում, այնուհետև` լուծ:

Մամուլի ծառայության տվյալներով, հունիսի 22-ի առավոտյան զբոսաշրջության նպատակով Երևան է ժամանել Իրանի Իսլամական Հանրապետության Գորգան քաղաքի շուրջ 50 քաղաքացի, որոնց մեծ մասը մանկապատանեկան մարզադպրոցի սաներ են` 11-13 տարեկան երեխաներ` ծնողների և մարզիչների ուղեկցությամբ:

Խմբի 15 անդամ (5 մեծահասակ և 10 երեխա) վարձակալել է մասնավոր առանձնատուն։ Հիվանդանոց հոսպիտալացված 5 երեխաները բնակվում են այդ տանը: Համաճարակաբանական հետազոտությամբ պարզվել է, որ նրանք հոսպիտալացման նախորդ երեկոյան տանն ընթրելիս կերել են Իրանից իրենց հետ բերված ձկան պահածո: Խմբի մյուս երեխաներն ու մեծահասակներն ընթրիքին բրինձ են կերել։ Նրանցից որևէ մեկը որևէ գանգատ չի նշում, բոլորն առողջ են:

Հինգշաբթի հիվանդանոց ընդունվելու պահին երեխաների վիճակը գնահատվել է միջին ծանրության։ Վարակաբանի կողմից նախնական ախտորոշվել է սուր գաստրոէնտերիտ: Հիվանդները ստացել են անհրաժեշտ բժշկական օգնություն, այժմ նրանց վիճակը բավարար է:

Վարձակալված առանձնատանն ապրող երեխաների և նրանց ուղեկցող մեծահասակների հետ տարվել է բացատրական աշխատանք` շոգ եղանակին սննդամթերքի ճիշտ պահպանման, մրգերի և բանջարեղենի պատշաճ լվացման, աղիքային վարակների, սննդային թունավորումների և այլ հարցերի վերաբերյալ:

Այս օկապակցությամբ, ՀՀ առողջապահության նախարարությունը կոչ է անում նաև Հայաստանի բնակիչներին հետևել սանիտարահիգիենիկ նորմերին և զգուշանալ սննդային թունավորումներից։ -0-