Երևանում BMW-ն մխրճվել է բենզալցակայանի սարքի մեջ. կա 1 զոհ, 1 վիրավոր

ԵՐԵՎԱՆ, 2 մայիսի. /Նովոստի–Արմենիա/. Նախօրեին՝ մայիսի 1-ին, խոշոր ավտովթար է տեղի ունեցել Երևանում:

Ժամը 21:50-ի սահմաններում BMW մակնիշի ավտոմեքենայի վարորդը Շիրակի փողոցում դուրս է եկել հանդիպակաց երթևեկելի գոտի, բախվել CPS բենզալցակայանի բենզին մատակարարող սարքին, այնուհետև բախվել էլետրասյանն ու գովազդային վահանակին, հաղորդում է shamshyan.com–ը։

Վթարի հետևանքով վարորդն ու ուղևորը մարմնական վնասվածքներով տեղափոխվել են «Սուրբ Աստվածամայր» բժշկական կենտրոն, որտեղ նրանցից մեկը մահացել է:

Վիրավորներին առաջինը օգնության են հասել բենզալցակայանի աշխատակիցներն ու քաղաքացիները, ովքեր իրենց անձնական ավտոմեքենաներով նրանց տեղափոխել են հիվանդանոց:

Կայքի հաղորդմամբ, վիրավորը գտնվում է ծայրահեղ ծանր, անգիտակից վիճակում:

Հաղորդվում է նաև, որ BMW –ն ամբողջությամբ վերածվել է մետաղե ջարդոնի:

Ոստիկանությունն ու քննչական բաժինը պարզում են մահացածի և վիրավորի ինքնությունը: Կայքի տեղեկություններով, BMW –ն հաշվառված է Երևան քաղաքի բնակիչ, 48-ամյա Թամարա Հակոբյանի անվամբ:–0–