Սպանություն Չարենցավանում. կասկածյալը ձերբակալվել է

ԵՐԵՎԱՆ, 28 հուլիսի. /Նովոստի-Արմենիա/. ՀՀ քննչական կոմիտեի Կոտայքի մարզային քննչական վարչությունում հարուցվել է քրեական գործ՝ Չարենցավան քաղաքի բնակիչ Գ.Մանվելյանի սպանության դեպքի առթիվ, հաղորդում է ՀՀ ՔԿ մամուլի ծառայությունը:

Հաղորդագրության համաձայն, ձեռնարկված անհետաձգելի քննչական և օպերատիվ-որոնողական միջոցառումների արդյունքում պարզվել է առերևույթ հանցագործություն կատարած անձի ինքնությունը, ով հայտնաբերվել է և ձերբակալվել։

2016 թ.-ի հուլիսի 27-ին ժամը 16:30-ին «Չարենցավանի բժշկական կենտրոն» ՓԲԸ-ից ահազանգ է ստացվել այն մասին, որ մարմնի բազմակի ծակած-կտրած վերքերով իրենց մոտ է տեղափոխվել Չարենցավան քաղաքի բնակիչ 31-ամյա Գ. Մանվելյանը։ Վերջինս, գիտակցության չգալով, բժշկական կենտրոնում մահացել է:

Դեպքի առթիվ Կոտայքի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի (սպանություն) հատկանիշներով:

Քննությամբ ձեռք բերված նախնական տվյալների համաձայն, Գ. Մանվելյանին կյանքի հետ անհամատեղելի մարմնական վնասվածքները պատճառվել են 2016 թ.-ի հուլիսի 27-ին ժամը 16:15-ի սահմանում` Չարենցավան քաղաքի շենքերից մեկի 5-րդ հարկի աստիճանահարթակում, հարևանի հետ տեղի ունեցած վիճաբանության ժամանակ, նշվում է հաղորդագրության մեջ:

Հարևանը հայտնաբերվել է և ձերբակալվել։

Ձեռնարկվում են անհրաժեշտ միջոցներ՝ դեպքի բոլոր հանգամանքների բազմակողմանի, օբյեկտիվ և լրիվ հետազոտումն ապահովելու ուղղությամբ:

Նախաքննությունը շարունակվում է: -0-