ԵՐԵՎԱՆ, 9 մարտի. /Նովոստի-Արմենիա/. Հինգշաբթի հրդեհ է բռնկվել Արմավիր քաղաքի տներից մեկում:
Ինչպես հայտնում է ՀՀ ԱԻՆ փրկարար ծառայությունը, ժամը 07:03-ին ահազանգ է ստացվել, որ հրդեհ է բռնկվել Արմավիրի մարզի Արմավիր քաղաքի Արևելյան 107-րդ թաղամասի տներից մեկի տանիքում:
Դեպքի վայր են մեկնել երկու մարտական հաշվարկ և մարզային փրկարարական վարչության օպերատիվ խումբը:
Հրդեհը մեկուսացվել է ժամը 07:30-ին, մարվել՝ 10:10-ին:
«Այրվել են մեկ հարկանի տան տանիքի կառուցատարրերը (40 քմ), հյուրասենյակը (20 քմ) և ննջասենյակը (20 քմ)՝ գույքով: Փրկարարները տան ննջասենյակում հայտնաբերել են Տ. Ք.-ի այրված դին», - հաղորդում է գերատեսչության մամուլի ծառայությունը: -0-