ԵՐԵՎԱՆ, 14 մարտի. /Նովոստի-Արմենիա/. Նախօրեին պայթյուն է տեղի ունեցել Վանաձորի բնակելի շենքերից մեկում, հաղրդում է ՀՀ ԱԻՆ փրկարար ծառայությունը:
Ժամը 18:00-ին տեղեկություն էր ստացվել, որ Լոռու մարզի Վանաձոր քաղաքի Տիգրան Մեծ պողոտայի թիվ 77 շենքի շքամուտքում տեղի է ունեցել պայթյուն:
Загружается новость ... "Лево"
Դեպքի վայր ժամանած փրկարարները պարզել են, որ պայթյունը տեղի է ունեցել շենքի 2-րդ շքամուտքի 1-ին հարկի պատին ամրացված փոստարկղում:
«Տուժածներ չկան, սակայն պայթյունի հետևանքով մասամբ փլուզվել է շքամուտքի և դրան կից գեղեցկության սրահի միջնապատը, վնասվել են շքամուտքի դռները և հարակից տարածքի ապակիներ», - նշվում է հաղորդագրության մեջ:
Փրկարարները տարհանել են շենքի բնակիչներին, գեղեցկության սրահի աշխատակիցներին և ոստիկանության աշխատակիցների հետ սահմանազատել տարածքը:
Դեպքի վայր ժամանած ՀՀ ՊՆ զորամասի ինժեներասակրավորական վաշտի ծառայողներն իրականացրել են տարածքի հետախուզում, սակայն պայթուցիկ սարքեր չեն հայտնաբերվել:
Ինչպես հայտնում է ՀՀ ՔԿ մամուլի ծառայությունը, դեպքի առթիվ հարուցվել է քրեական գործ` ՀՀ քրեական օրենսգրքի 185-րդ հոդվածի 2-րդ մասի 1-ին կետով (Գույքը դիտավորությամբ ոչնչացնելը կամ վնասելը, որը կատարվել է հրկիզման, պայթյունի կամ հանրավտանգ այլ եղանակով):
Կատարվել է դեպքի վայրի զննություն, նշանակվել են մի շարք փորձաքննություններ: Իրականացվում են անհրաժեշտ քննչական և դատավարական այլ գործողություններ` առերևույթ հանցագործություն կատարած անձի ինքնությունը պարզելու ուղղությամբ: -0-