Նռնակով տղամարդը պահանջել է բացել Գորիսի ոստիկանության մուտքի դուռը

ԵՐԵՎԱՆ, 14 փետրվարի. /Նովոստի-Արմենիա/. ՀՀ ՔԿ-ն ներկայացրել է միջադեպի մանրամասները, որի ժամանակ տղամարդը պահանջել է բացել Գորիս քաղաքի ոստիկանության մուտքի դուռը:

ՀՀ ՔԿ մամուլի ծառայության հաղորդմամբ, միջադեպը տեղի է ունեցել 2017թ. փետրվարի 10-ին ժամը 16:30-ի սահմանում:

«Առերևույթ հանցագործություն կատարած անձը ապօրինի ձեռք բերված և իր մոտ պահվող ռազմամթերք հանդիսացող «Ф1» տեսակի ձեռքի բեկորային մարտական նռնակով և նռնակին ամրացված «УЗРГМ» տեսակի մարտական պայթուցիչով մոտեցել է Գորիս քաղաքի ՀՀ ոստիկանության Գորիսի բաժնի վարչական շենքին և պահանջել բացել մուտքի դուռը», - նշվում է հաղորդագրության մեջ:

Ապա հեռացել է և քայլել հարակից փողոցով՝ ճանապարհին նետելով նռնակն` առանց նռնակի պայթուցիչի օղը քաշելու, ինչից հետո անմիջապես բերման է ենթարկվել: Պարզվել է առերևույթ հանցագործություն կատարած անձի ինքնությունը, ով հանդիսանում է Գորիս քաղաքի բնակիչ, ինչպես նաև՝ նման քայլի գնալու պատճառը։

Կատարվել է դեպքի վայրի զննություն, բնակարանների խուզարկություններ, որի արդյունքում հայտնաբերվել են 4 փամփուշտ, ձեռքի հակատանկային նռնականետ, սվին դանակ, 3 փաթեթ թմրանյութի նմանվող դեղնականաչավուն զանգված: Նշանակվել դատապայթունատեխնիկական, դատաբժշկական և տոքսիկոքիմիական փորձաքննություններ:

Ձեռք բերված ապացույցների հիման վրա՝ Գորիս քաղաքի բնակչին մեղադրանք է առաջադրվել ՀՀ քրեական օրենսգրքի 235-րդ հոդվածի առաջին մասով (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։

Նախաքննությունը շարունակվում է: -0-