ՀՀ նախագահը ցավակցություն է հայտնել Բրազիլիայի քաղաքացիներով ինքնաթիռի կործանման կապակցությամբ

ԵՐԵՎԱՆ, 30 նոյեմբերի. /Նովոստի-Արմենիա/. ՀՀ նախագահ Սերժ Սարգսյանը ցավակցական հեռագիր է հղել Բրազիլիայի Դաշնային Հանրապետության նախագահ Միշել Տեմերին՝ Կոլումբիայի Մեդելին քաղաքի մերձակայքում տեղի ունեցած ինքնաթիռի վթարի կապակցությամբ, որը տասնյակ զոհերի պատճառ է դարձել, հաղորդում է ՀՀ նախագահի մամուլի ծառայությունը։

Սարգսյանը Բրազիլիայի համար այս դժվարին պահին վշտակցություն և զորակցություն է հայտնել նախագահ Տեմերին, բարեկամ Բրազիլիայի ժողովրդին և զոհվածների հարազատներին՝ մաղթելով ոգու արիություն և համբերություն: Սարգսյանի խոսքով, այն փաստը, որ ողբերգական վթարից փրկվածներ կան, արդեն իսկ առաջ նայելու ուժ է պարգևում:

Նախօրեին Կոլումբիայում վթարի է ենթարկվել բոլիվիական LaMia ավիաընկերության ինքնաթիռը, որում գտնվել է 72 ուղևոր և անձնակազմի 9 անդամ: Ինքնաթիռում 27 բրազիլացի ֆուտբոլիստներ են եղել («Շապեկոենսե» թիմ) և նրանց ուղեկցող լրագրողները: Թիմը ուղևորվում էր Մեդելին, որտեղ դեկտեմբերի 1-ին պետք է տեղի ունենար Հարավամերիկյան գավաթի խաղը «Շապեկոենսեի» և «Աթլետիկո Նասիոնալի» միջև: ԶԼՄ-ների տվյալներով, 13 մարդ փրկվել է: -0-