Ֆրանսիական հեռուստաալիքը հաստատել է А321–ում գրանցված պայթյունի մասին տեղեկությունները

ԵՐԵՎԱՆ, 7 նոյեմբերի./Նովոստի–Արմենիա/. «Կոգալիմավիա» ավիաընկերության А321 ինքնաթիռի սև արկղերից մեկը պայթյունի ձայն է գրանցել, ուրբաթ France 2 ֆրանսիական հեռուստաալիքին է տեղեկացրել ավիավթարի քննության անանուն մասնակիցը։

 «Ինքնաթիռի սև արկղերը թռիչքի ժամանակ պայթյունի հստակ ձայն են գրանցել», – հաղորդում է Ինտերֆաքսը` հղում անելով հեռուստաալիքին։

Le Point ֆրանսիական ամսագիրն իր կայքում մեջբերում է փորձագետներից մեկի խոսքերն այն մասին, որ օդանավի ինքնագիրների վերծանումն ավարտված է։

Պուտինը հանձնարարել է դադարեցնել քաղաքացիական ավիահաղորդակցությունը Եգիպտոսի հետ>>

Նրա խոսքով, ինքնագիրներից ստացված տվյալների համաձայն` պայթյունի ձայնից հետո ինքնաթիռում անջատվել է էլեկտրականությունը, ինչի պատճառով տվյալների գրանցումը դադարել է։

Լրագրողների զրուցակիցը պարզաբանել է, որ, նրա կարծիքով, այս դեպքում հիմքեր չկան կարծելու, թե գրանցված պայթյունը տեխնիկական անսարքությունների, մասնավորապես` շարժիչի հետ կապված խնդիրների հետևանք է։

Le Figaro–ն ևս մեջբերում է քննության ընթացքին ծանոթ աղբյուրի խոսքերը։ Նրա հաղորդմամբ` թռիչքի ժամանակ ոչ մի բան չի կանխորոշել աղետը։ «Ամեն ինչ նորմալ է եղել։ Եվ, հանկարծ, ամեն ինչ ավարտվել է», – նշել է նա։

Ուրբաթ «Կոմերսանտ» ռուսական հրատարակությունը, հղում անելով սեփական աղբյուրներին, տեղեկացրել է, որ թռիչքի ընթացքում տեղի է ունեցել մի իրադարձություն, ինչից հետո ինքնաթիռի համակարգերի աշխատանքի բոլոր պարամետրերի գրանցումը վայրկենապես ընդհատվել է։