ԵՐԵՎԱՆ, 22 ապրիլի. /Նովոստի-Արմենիա/. Հինգշաբթի արտակարգ դեպք է տեղի ունեցել Երևանում:
Ժամը 19:30-ի սահմանում ոստիկանության Երևան քաղաքի վարչության ՊՊԾ գնդի 3-րդ վաշտի ծառայողները, Դավիթաշենի կամրջի վրա ծառայություն կատարելու ժամանակ, նկատել են, որ մի քաղաքացի անցել է կամրջի վտանգավոր եզրագիծը և փորձում է իրեն ցած նետել:
Ինչպես հայտնում է shamshyan.com կայքը, ոստիկանության ծառայողները տևական ժամանակ բանակցություններ են վարել այդ քաղաքացու հետ, որից հետո կարողացել են դուրս բերել նրան կամրջի վտանգավոր եզրագծից:
Ոստիկանության ծառայողները քաղաքացուն տեղափոխել են ոստիկանության Մաշտոցի բաժին:
Կայքի տեղեկություններով՝ քաղաքացին 55-ամյա Լևոն Սիմոնյանն էր, ով բնակվում է Երևան քաղաքում, սակայն, ըստ իր հայտարարության՝ ծայրահեղ այդ քայլին դիմել է, քանի որ դատարանը իրեն զրկել է բնակարանի իրավունքից: -0-