ԵՐԵՎԱՆ, 24 մարտի. /Նովոստի-Արմենիա/. ՀՀ քննչական կոմիտեի Լոռու մարզային քննչական վարչությունում միջոցներ են ձեռնարկվում՝ Ալավերդիում տղամարդու մահվան պատճառները պարզելու ուղղությամբ, հաղորդում է ՀՀ ՔԿ մամուլի ծառայությունը:
Հաղորդագրության համաձայն, 2017թ. մարտի 23-ին` ժամը 18:30-ին, ահազանգ է ստացվել առ այն, որ Ալավերդի-Հաղպատ ավտոճանապարհի 3-րդ կմ-ում՝ Դեբեդ գետում͵ հայտնաբերվել է տղամարդու դիակ: Պարզվել է վերջինիս ինքնությունը͵ ով Ալավերդի քաղաքի բնակիչ է՝ ծնված 1973 թվականին։
Նախնական տվյալներով՝ տղամարդը 2017թ. մարտի 23-ին` ժամը 17:00-ի սահմանում, Ալավերդի քաղաքի Թումանյան փողոցի 59-րդ հասցեում գտնվող բանկի դիմացի պատի վրայից նետվել է Դեբեդ գետը:
Ինչպես նշվում է հաղորդագրության մեջ, պարզվել է, որ տուժողը հաշվառված է եղել «Ալավերդի բժշկական կենտրոն» ՓԲԸ-ում՝ «Շիզոֆրենիա» ախտորոշմամբ, և ընդունել է հոգեմետ դեղորայք։
Տղամարդու մահվան պատճառները պարզելու համար նշանակվել է դատաբժշկական փորձաքննություն։ -0-