Բյուրական գյուղի հարակից սարի անտառային հրդեհը նոր թափ է ստանում

ԵՐԵՎԱՆ, 4 սեպտեմբերի. /Նովոստի–Արմենիա/. Բյուրական գյուղի հարակից սարի անտառային հրդեհը նոր թափ է ստանում, հայտնաբերվել է հրդեհի նոր օջախ։

ՀՀ ԱԻՆ Փրկարար ծառայության հաղորդմամբ, սեպտեմբերի 3-ին, ժամը 15:26-ին ահազանգ է ստացվել, որ Արագածոտնի մարզի Բյուրական գյուղին հարակից սարին՝ անտառում, հրդեհ է բռնկվել:

Հրդեհաշիջման աշխատանքներին մասնակցում է 60 հրշեջ-փրկարար, անտառտնտեսության 30, ոստիկանության 25  աշխատակից և Բյուրական ու Օրգով գյուղերից շուրջ 115 բնակիչ:

Տեղում հրդեհաշիջման աշխատանքները ղեկավարում է ՓԾ մարզային փրկարարական վարչության պետ, փ/ծ գնդապետ Ա. Ամիրջանյանը:

Նախնական տվյալների համաձայն՝ մոտ 20 հա տարածքում այրվել է բուսածածկ և անտառածածկ տարածք:

«Ժամը 11:10-ի դրությամբ հայտնաբերվել է հրդեհի նոր օջախ: Ժամը 12:09-ին դեպքի վայր է մեկնել մեկ մարտական հաշվարկ», – նշվում է հաղորդագրության մեջ։–0–