Արարատում բախվել են էլեկտրաքարշն ու բեռնատարը. կա վիրավոր

ԵՐԵՎԱՆ, 9 մարտի. /Նովոստի-Արմենիա/. Հինգշաբթի արտակարգ դեպք է տեղի ունեցել Արարատի մարզում։

Ժամը 12։40-ի սահմանում Երևան-Երասխ ավտոճանապարհի Արարատ քաղաքի Բանավան թաղամասում՝ Արարատի ցեմենտի գործարանի հարևանությամբ անցնող երկաթուղային գծանցումում բախվել են Կոտայքի Նոր Արտամետ գյուղի բնակիչ, 29-ամյա Էդվարդ Մարգարյանի վարած «MAN» մակնիշի բեռնատարը և Երևանի բնակիչ, 52-ամյա Գագիկ Եղիազարյանի վարած «ВԼ10-825» համարանիշի էլեկտրաքարշը։

Ինչպես հայտնում է shamshyan.com կայքը, բախման հետևանքով «MAN» մակնիշի ավտոմեքենայի կցորդը, որում բարձված է եղել մոտ 30 տոննա ցեմենտ, պոկվել և ընկել է գնացքի գծերի վրա, իսկ «MAN»-ի առջևի մասն էլ պոկվել և հայտնվել է գծերի հարևանությամբ՝ լճակի մեջ։

Վթարի հետևանքով «MAN»-ի վարորդը տեղի բնակիչների ուժերով դուրս է բերվել ավտոմեքենայից և հոսպիտալացվել Արարատի հիվանդանոց։

Դեպքի վայր են ժամանել Ճանապարհային ոստիկանության աշխատակիցները, ՃՈ հետաքննիչները, ում կողմից փաստի առթիվ նյութեր են նախապատրաստվում։

Կայքի հաղորդմամբ, այս պահին սպասում են, որպեսզի վթարի վայր ժամանեն հատուկ մասնագետները, որպեսզի երկաթգծի վրայից հեռացվի 30 տոննա ցեմենտը, ինչից հետո նշված հատվածում երթևեկությունը կվերականգվի։ -0-