ԵՐԵՎԱՆ, 5 սեպտեմբերի. /Նովոստի-Արմենիա/. Նախօրեին առեղծվածային դեպք է տեղի ունեցել Երևանում։
Ժամը 23։00-ի սահմանում Երևանի 1-03 շտապօգնության հերթապահ խումբը կանչով մեկնել է Հայաստանում ՌԴ դեսպանատուն, որտեղ հայտնաբերել է տղամարդու դի։
Shamshyan.com կայքի հաղորդմամբ, դեսպանատուն են ժամանել ոստիկանության Կենտրոնական բաժնի աշխատակիցները, ովքեր պարզել են, որ մահացածը ՌԴ քաղաքացի, 52-ամյա Անդրեյ Սմիռնովն էր։
Կայքի տեղեկություններով, նա ժամանակավորապես բնակվում էր դեսպանատանը, և նրա դին հայտնաբերվել է լոգարանում։
Դատաբժշկի նախնական եզրակացության համաձայն՝ դիակի վրա բռնության հետքեր չեն հայտնաբերվել։
Փաստի առթիվ Հայաստանի քննչական կոմիտեի Երևանի քննչական վարչության Կենտրոնական քննչական բաժնում նյութեր են նախապատրաստվում։ -0-