ԵՐԵՎԱՆ, 24 դեկտեմբերի. /Նովոստի–Արմենիա/. Գերմանիայի կանցլեր Անգելա Մերկելը Լոնդոն կատարած այցի ժամանակ Մեծ Բրիտանիայի հատուկ ծառայությունների ղեկավարների կողմից տվյալներ է ստացել «Իսլամական պետություն» ահաբեկչական խմբավորման մասին, իսկ դրա փոխարեն նրանց է փոխանցել տեղեկություններ Ռուսաստանի, Պուտինի, Ուկրաինայում տիրող անկայուն իրավիճակի և Ղրիմի մասին, հաղորդում է The Times թերթը` հղում անելով Մեծ Բրիտանիայի վարչապետի աշխատակազմի աղբյուրին։
Ինչպես հաղորդում է gazeta.ru–ն, հղում անելով The Times–ին, Մերկելի և բրիտանական հատուկ ծառայությունների ղեկավարների հանդիպմանը ներկա է եղել նաև վարչապետ Դևիդ Քեմերոնը, հանդիպումը տեղի է ունեցել վարչապետի քաղաքամերձ նստավայրում դեռևս 2015 թ.–ի հոկտեմբերին։ Հանդիպմանը մասնակցել են նաև MI5 հակահետախուզական ծառայության ղեկավար Էնդրյու Փարքերը, Մեծ Բրիտանիայի արտաքին հետախուզության ղեկավար Ալեքս Յանգերն ու Մեծ Բրիտանիայի կառավարական կապի կենտրոնի տնօրեն Ռոբերտ Հաննիգանը։
Հրատարակությունը նշում է, որ Մերկելի համար բավականին ինֆորմատիվ էին տվյալներն այն մասին, թե Եվրոպայի համար ինչ սպառնալիք են ներկայացնում ԻՊ–ն և ուրիշ ահաբեկչական խմբավորումները։
The Times–ն ընդգծում է, որ Բրիտանիայի և Գերմանիայի հատուկ ծառայությունների ներկայացուցիչները կանոնավոր կերպով տեղեկատվություն են փոխանակում պաշտոնական մակարդակում։ Այդուհանդերձ, հրատարակությունը նշում է, որ հազվադեպ են այնպիսի հանդիպումները, երբ տեղեկությունները փոխանցվում են հատուկ ծառայությունների ղեկավարներից Մերկելին և հակառակը։
Երկու քաղաքական գործիչների հանդիպումը տեղի է ունեցել 2015 թ.–ի հոկտեմբերին Բրիտանիայի վարչապետի քաղաքամերձ նստավայրում։ Այդ ժամանակ նրանք հայտնել են, որ Ռուսաստանի դեմ կիրառվող եվրոպական պատժամիջոցները հարկավոր է թողնել ուժի մեջ մինչև Մինսկի համաձայնագրերի ամբողջական կատարումը, ինչպես նաև նշել են, որ Սիրիայում տիրող իրավիճակը սպառնալիք է ներկայացնում, սակայն պետք է կարգավորվի քաղաքական ճանապարհով։ –0–