Կիսելյով. մեզ ռուսամետ մեդիա–ռեսուրսներ պետք չեն

ԵՐԵՎԱՆ, 30 նոյեմբերի. /Նովոստի–Արմենիա/. «Ռոսիա սեգոդնյա» ՄԼԳ-ի գլխավոր տնօրեն Դիմիտրի Կիսելյովը հայտարարել է, որ Ռուսաստանին հարկավոր չեն ռուսամետ մեդիա–ռեսուրսներ։

«Մեզ որևէ տեղ հարկավոր չեն ռուսամետ ռուսուրսներ։ Մեզ անհրաժեշտ են ռեսուրսներ, որոնք կարտացոլեն յուրաքանչյուր երկրի ազգային շահերը», – ասաց Կիսելյովը «Ռոսիա սեգոդնյա» ՄԼԳ–ում կազմակերպված օտարերկրյա ԶԼՄ–ների ներկայացուցիչների հետ հանդիպման ժամանակ, որի նպատակն էր քննարկել ԶԼՄ–ների դերը միջազգային հումանիտար համագործակցության զարգացման գործում Ռոսսոտրուդնիչեստվոյի 90–ամյակին նվիրված մոսկովյան համաժողովի շրջանակում։

Կիսելյովը նաև նշեց, որ լրագրության մեջ օբյեկտիվություն գոյություն չունի, և բոլոր լրագրողներն աշխատում են եռաշերտ պայմաններում։ Առաջին շերտը, նրա խոսքով, ինչ–որ մեկի կողմից ընտրված, իսկ դա նշանակում է` արդեն սուբյեկտիվ տեղեկատվությունն է, երկրորդ շերտն այն տեղեկատվությունն է, որն ընտրում է լրագրողը` հաշվի առնելով իր ԶԼՄ–ի խմբագրական քաղաքականությունը, և այն ևս սուբյեկտիվ է։ Իսկ երրորդ շերտն անխուսափելիորեն առաջանում է այն ժամանակ, երբ երևույթները կոչվում են իրենց անուններով (մեկի համար` ահաբեկիչներ, մյուսի համար` ապստամբներ)։

Միաժամանակ Կիսելյովը նշեց, որ Ռուսաստանում հաջողվել է լրագրությունը դարձնել հարթակ ամենալայն գաղափարները քննարկելու համար։

«Հազվագյուտ բացառության դեպքում, բանավեճն ընթանում է բարյացակամ մթնոլորտում։ Չկան սահմանափակումներ, չնայած լինում է այնպես, որ լրագրողական հանրությունն ու քաղաքացիական հասարակությունը վրդովվում են ինչ–որ արտահայտությունների կապակցությամբ», – նշեց ռուսական գործակալության ղեկավարը։

«Ժողովրդական դիվանագիտության դերը հումանիտար համագործակցության զարգացման գործում» խորագրով համաժողովը նվիրված էր Ռոսզարուբեժցենտր–Ռոսսոտրուդնիչեստվո համակարգի 90–ամյակին, այն անցկացվեց նոյեմբերի 26–ին Մոսկվայում։

Համաժողովին մասնակցում էին աշխարհի 100 երկրներից ժամանած շուրջ 500 պատվիրակներ, որոնց թվում էին Ռուսաստանի հետ արտասահմանյան երկրների բարեկամության կազմակերպությունների, պետական իշխանության մարմինների, ԶԼՄ–ների ներկայացուցիչներ, պատգամավորներ, մշակութային գործիչներ, ռուսաց լեզվի և գրականության մասնագետներ։–0–