ԵՐԵՎԱՆ, 11 նոյեմբերի. /Նովոստի–Արմենիա/. Հնդկաստանի գործարար և դերասանական վերնախավը մտադիր է Մեծ Բրիտանիայից ետ ստանալ աշխարհի ամենահայտնի ադամանդներից մեկը` «Կոհինորը»։ Ինչպես հայտնում է Times of India թերթը, նախաձեռնողական խումբը հայց է պատրաստում բրիտանացի թագուհի Եղիսաբեթ Երկրորդի դեմ Լոնդոնի վարչապետի` նոյեմբերի 12-15–ը Հնդկաստան այցի նախօրեին։
«Հնդկական բիզնեսի և լայն հասարակայնության ներկայացուցիչները մտադիր են վերադարձնել ազգային սեփականությունը` աշխարհահռչակ «Կոհինոր» ադամանդը»,– լրագրողներին ասել է նախաձեռնողական խմբի ներկայացուցիչ, ձեռնարկատեր Դավիդ դը Սոուզան, ով գլխավորում է Հնդկաստանի հարավային Գոա նահանգում գտնվող «Տիտոս» զբոսաշրջային ընկերությունը։ Ըստ նրա, դա Հնդկաստանից «կասկածելի հանգամանքներում» բրիտանացիների դուրս բերած բազմաթիվ առարկաներից միայն մեկն է։ «Գաղութարարները ոչ միայն թալանել են մեր ժողովրդին, այլ նաև ոչնչացրել են բարոյապես` դաժան հասարակություն ստեղծելով։ Հետևանքները դուք կարող եք տեսնել մեր երկրում մինչ օրս` դա և զանգվածային աղքատությունն է, և կրթության բացակայությունը, և նախկինում տեղ գտած հասարակական խտրականության այլ բազմաթիվ վկայություններ»,– ասել է գործարարը, հաղորդում է
ՏԱՍՍ–ը։
Դավիդ դը Սոուզան ասել է, որ մասնակցում է «առաջիկա դատավարության ֆինանսավորմանը» և արդեն «բրիտանացի իրավաբանների է ներգրավել այդ գործում», որը, ինչպես ակնկալվում է, առաջիկայում կհայտնվի բարձրագույն դատական ատյաններում։
«Լույսի լեռ»
«Կոհինորը» համարվում է աշխարհի ամենահայտնի և առավել հնագույն ալմաստներից է։ Ըստ լեգենդի, այն գտնվել է հինգ հազար տարի առաջ Հարավային Հնդկաստանի Հոլկոնդայի լեգենդար հանքերում։ Քարի առաջին տերն Արևի աստծո որդի, առասպելական դյուցազն Կարնան էր հնդկական «Մահաբհարատա» էպոսից։ Հավաստի տեղեկություններով, մինչև 1304 թվականն ալմաստը պատկանել է Մալվա հնդիկ ռաջաների դինաստիային։ Այն հայտնվել է Դելիի գանձարանում Ալաադ Դին Հիլջիի զավթողական պատերազմների հետևանքով։
1848 թվականին հնդիկների նկատմամբ բրիտանական բանակի հաղթանակից հետո «Կոհինորը» կամ «Լույսի լեռը» և այլ զարդեր անցել են Օսթ–Հնդկական ընկերությանը, որն այն նվիրաբերել է Մեծ Բրիտանիայի Վիկտորիա թագուհուն 1850 թվականի հուլիսի 3–ին։
Այդ ժամանակից Մեծ Բրիտանիան իրեն համարում է հնդկական հողի գանձի լիիրավ տեր, ինչի հետ այսքան տարիներ չեն կարողանում հաշտվել իրենք` հնդիկները։ «Կոհինորը» վերադարձնելու պահանջները նախկինում էլ են հնչել, սակայն առաջին անգամ դրանք կներկայացվեն որպես դատական հայց, որը հատուկ նախապատրաստվում է նոյեմբերի կեսին Հնդկաստանի վարչապետ Նարենդրա Մոդիի պաշտոնական այցին ընդառաջ։ --0--
