ԵՐԵՎԱՆ, 7 ապրիլի. /Նովոստի–Արմենիա/. ԱՄՆ նախագահ Դոնալդ Թրամփը հինգշաբթի հայտարարել է, որ հրաման է տվել հարված հասցնել Սիրիայի ավիակայանին, որից, նրա խոսքով, ենթադրյալ քիմիական գրոհ է կատարվել Իդլիբ շրջանում։
Համապատասխան հայտարարությամբ ամերիկացի առաջնորդը հանդես է եկել լրագրողների առջև Ֆլորիդա նահանգի «Մար–ա–Լագո» կալվածքում, գրում է
ՏԱՍՍ–ը։
«Այսօր հրաման եմ արձակել թիրախային հարված հասցնել Սիրիայի ավիակայանին, որից քիմիական գրոհ է իրականացվել։ – Մահաբեր քիմիական զենքի տարածման և օգտագործման կանխումն ու զսպումն ԱՄՆ–ի ազգային անվտանգության շահերից է բխում»։ Ինչպես հայտնում է NBC–ն, հղում անելով ռազմական աղբյուրների, հարվածը կարող է կրկնվել Թրամփի հրամանի դեպքում։
ԱՄՆ նախագահը կոր է արել բոլոր քաղաքակիրթ ազգերին միավորվել` Սիրիայում արյունահեղությանը վերջ տալու համար։
Reuters–ի հաղորդմամբ, հարվածի թիրախն օդակայանի թռիչքուղին էր, ինչպես նաև ռազմական ինքնաթիռները և վառելիքը։
Ավելի վաղ NBC–ն, հղում անելով ռազմական աղբյուրներին, հայտնել է, որ ԱՄՆ Զինված ուժերը 50 հրթիռ է ուղղել Սիրիայի ռազմակայան` Հոմս շրջան։ Նրանց տեղեկացմամբ, հրթիռակոծումը սիրիական Իդլիբ շրջանում ենթադրվող քիմիկական գրոհի պատասխանն է։ Tomahawk բոլոր հրթիռները բաց են թողնվել Հոմսի օդակայանի ուղղությամբ։ -0-