ԵՐԵՎԱՆ, 15 հունվարի. /Նովոստի–Արմենիա/. ԱՄՆ Հավայի նահանգում հրթիռակոծման տագնապ է հայտարարվել։ Բնակիչներին խորհուրդ են տվել որքան հնարավոր է շուտ ապաստան գտնել կղզու կողմը թռչող բալիստիկ հրթիռի պատճառով։ Տագնապի ժամանակ հայտարարվել է նաև, որ այն ուսումնական չէ։
Ավելի ուշ պարզվել է, որ հրթիռակոծման տագնապը սխալմամբ է հայտարարվել, գրում է tvzvezda.ru–ն` հղում անելով CNN-ին։ Նահանգապետ Դևիդ Այժին հայտարարել է, որ տագնապը կեղծ է։
«Սխալ է տեղի ունեցել հերթափոխի հանձնման ժամանակ, աշխատակիցը սխալ կոճակ է սեղմել», – նշել է Այջին։
Նա Twitter–ի իր միկրոբլոգում նշել է նաև, որ հանդիպում կկազմակերպի նահանգի ղեկավարության հետ նման միջադեպերը կանխելու համար։
Տեղի ունեցածի մասին զեկուցվել է ԱՄՆ նախագահ Դոնալդ Թրամփին։ Ընթանում է քննություն։
Նշենք, որ տագնապի ժամանակ Հավայան կղզիներում է եղել նաև հոլիվուդյան դերասան Ջիմ Քերին, ով մեկնաբանել է տեղի ունեցածը Twitter–ի միկրոբլոգում։
«Այսօր առավոտյան արթնացա Հավայան կղզիներում և հասկացա, որ ապրելու համար 10 րոպե է մնացել։ Դա կեղծ տագնապ էր, սակայն իրական հոգեկան նախազգուշացում», – գրել է դերասանը։–0–