Ֆինանսական խաղեր և հատուկ ակցիաներ. Հայաստանում մեկնարկել է ֆինանսական գրագիտության «թեժ աշունը»

ԵՐԵՎԱՆ, 20 սեպտեմբերի. /Նովոստի–Արմենիա/. Հայաստանի բանկերի միությունը գործարկել է «Ֆինանսական գրագիտություն և հմտություններ» միջոցառումների շարքը` բնակչության ֆինանսական գրագիտության մակարդակը բարձրացնելու նպատակով։

«Նոր ուսումնական տարին նոր գիտելիքներով» նախաձեռնության շրջանակում հինգշաբթի մեկնարկել է ֆինանսական կրթության սեմինարների և դասախոսությունների երկօրյա դասընթաց Հայաստանի տարբեր բուհերի ուսանողների համար, որը ՀԲՄ–ի հետ միասին վարում են Ամերիաբանկի լավագույն փորձագետները։ Պրակտիկ պարամպմունքների վայր է ընտրվել Անգլիական այգին։

Ինչպես լրագրողների հետ զրույցում հայտնեց Ամերիաբանկի անձնական բանկային ծառայությունների և քարտերի վարչության պետ Էլեն Դանիելյանը, երկու օրվա ընթացքում ուսանողներին հնարավորություն կտրվի համալրել գիտելիքները բանկային ծառայությունների օգտագործման և տրանզակցիաների իրականացման վերաբերյալ անհրաժեշտ տեղեկություն ստանալու ոլորտում։

«Մենք ընտրել ենք պարապմունքների անցկացման նորագույն մեթոդներ, որոնք ուղղված են ինտերակտիվ շփմանը։ Մեր նպատակը ոչ թե տեսական գիտելիքների փոխանցումն է, այլ կիրառական հմտությունների տրամադրումը։ Միջոցառումներին մասնակցում են բանկային գործում արդեն որոշակի գիտելիքներ ունեցող ուսանողները։ Մենք մտադիր ենք այդ գիտելիքներն ուղղել ճիշտ հուն»,– ասաց նա։

Նրա խոսքով, պարապմունքների ընթացքում փորձագետները կօգնեն ուսանողներին նշել այն գործոնները, որոնց պետք է ուշադրություն դարձնել բանկի ծառայություններից օգտվելիս, առանձնացնել կարևորը երկրորդայինից, մշակել ստացված տեղեկությունը։

«Մեր հիմնական նպատակն իրազեկվածության և սեփական գիտելիքների ռացիոնալ օգտագործման մակարդակի բարձրացումն է»,– ընդգծեց նա։
Ուսանողներին հնարավորություն է տրվում ոչ միայն լսել Հայաստանի բանկային համակարգի առաջատար փորձագետների դասախոսությունները, այլ նաև հետաքրքրող թեմաներով հարցեր ուղղել և խնդիրներ հնչեցնել` համատեղ լուծման համար։

ՀԲՄ գործադիր տնօրեն Սեյրան Սարգսյանը նշեց, որ ֆինանսական գրագիտության բարձրացումը նպաստում է համակարգի զարգացմանը, մյուս կողմից օգնում է ճիշտ ընտրել անհրաժեշտ պահանջների համապատասխանող լավագույն պրոդուկտը։

«Կարևոր է, որ մեր քաղաքացիները ֆինանսական կրթության ոլորտում հենքային գիտելիքներ ունենան։ Հենց այդ նպատակով մենք անցկացնում ենք տարբեր սեմինարներ, դասախոսություններ և պարապմունքներ տարբեր լսարանների համար, ինչպես նաև ընտրված թեմաներով քննարկումներ»,– նշեց նա։

Նրա խոսքով, միջոցառումներին մասնակցում են երկրի առաջատար բանկերը, քննարկվում են զանազան թեմաներ, որոնք հնարավորություն կընձեռեն ուսանողներին պատասխաններ գտնել իրենց հուզող հարցերին։ Դրանով իսկ նրանց տրված է բանկերի առաջարկություններում ճիշտ կողմնորոշվելու, սեփական հաշիվները գրագետ տնօրինելու հնարավորություններ։

Հասարակական միջոցառումների շարքի երկրորդ նպատակային խումբը կներկայացնեն Երևանի և մարզերի ավագդասարանցիները, որոնք կայցելեն բանկեր, կծանոթանան նրանց գործունեությանն ու գործառույթներին։ Նաև ծրագրվում է ուսուցողական ֆինանսական խաղերի, «Ապագայի բանկն իմ պատկերացմամբ» շարադրությունների մրցույթների անցկացում, տեսանյութերի դիտում, իսկ ուսանողների համար` բիզնես ծրագրերի կազմման մրցույթի անցկացում։

Հոկտեմբերի 31–ին` Խնայողությունների օրը, հայկական բանկերը հանդես կգան բարձր տոկոսներով փոքր գումարի ավանդների իչացման հնարավորությունների առաջարկներով, ինչպես նաև կանցկացվեն` ցուցահանդես, վարպետաց դասեր և սեմինարներ, զանազան մրցույթներ։

Աշնանը կանցկացվի նաև հեռուստահաղորդումների և տեսահոլովակների շարք, որոնցում կներկայացվեն բանկային տարբեր ծառայություններ, ֆինանսական հարցեր, որոնք առավել հետաքրքրություն են առաջացնում բնակչության շրջանում։ Ամենապատանի սպառողների համար նախատեսված են թատերականացված ներկայացումներ։
Միջոցառումների շարքը կավարտվի ֆինանսական գրագիտության թեմայով վերլուծական հոդվածների լավագույն հեղինակների պարգևատրմամբ։ Դրանք կհանձնվեն հեռուստատեսությամբ, ռադիոյով, տպագիր և էլեկտրոնային մամուլում տեղ գտած հրապարակումների մոնիթորինգի հիման վրա։ -0-