ԵՐԵՎԱՆ, 1 փետրվարի. /Նովոստի-Արմենիա/. «Երևան» հիմնադրամի կողմից հասցված 1,8 մլրդ դրամի (մոտ 3,7 մլն դոլար) վնասը լիովին փոխհատուցվել է ՀՀ պետբյուջե, այդ մասին հայտարարեց ՀՀ Ազգային անվտանգության տնօրեն Արթուր Վանեցյանն ուրբաթ լրագրողների հետ զրույցում:
«Հիմնադրամը վատնել է այդ գումարի մի մասը, մյուս մասն օգտագործվել է անարդյունավետ, երրորդ մասը ծախսվել է աննպատակ», - ասաց Վանեցյանը:
2018 թ.-ի հուլիսին ՀՀ ԱԱԾ-ն խուզարկություն է կատարել «Երևան» հիմնադրամի գրասենյակներում` հիմնադրամում պաշտոնական դիրքի օգտագործմամբ կատարած չարաշահումների և խարդախությունների գործով։ Պատճառը քաղաքացիների դժգոհություններն էին, որ շինարարության թույլտվության կամ սեփականության գրանցման համար պաշտոնատար անձինք, բացի օրենսդրությամբ նախատեսված մուծումներից, պահանջել են մեծ գումարներ փոխանցել հիմնադրամի հաշվին:
Երևանի նախկին քաղաքապետ Տարոն Մարգարյանը, ով եղել է «Երևան» հիմնադրամի հոգաբարձուների խորհրդի նախագահ, ընդունել է ավելի վաղ հայտնաբերված սխալները: Վերադարձի ենթակա գումարը կազմում է մոտ 1,8 մլրդ դրամ:-0-