ԵՐԵՎԱՆ, 6 դեկտեմբերի./Նովոստի–Արմենիա/. Հայաստանում վճարովի ավտոճանապարհ կգործի։
Մինչև 2020 թվականը Քաջարան և Սիսիան քաղաքներն իրար կկապվեն վճարովի ավտոճանապարհով։ Այժմ գործող 2 ու կես ժամ տևողությամբ ավտոճանապարհը հնարավոր կլինի փոխարինել 40 րոպեանոց վճարովի ճանապարհով։
«Մենք ընտրել ենք Քաջարանից Սիսիան ընկած հատվածը։ Առկա ճանապարհն այս պահին թեքվում է դեպի Կապան, անցնում է Գորիսով և գալիս է դեպի Սիսիան։ Եթե ուղիղ ծրագրով հնարավորություն լինի միացնել Քաջարանը և Սիսիանը իրար, ապա զգալի տնտեսման հնարավորություն կտա թե ժամանակի, թե վառելիքի»,- ասել է ՀՀ տրանսպորտի և կապի նախարարի առաջին տեղակալ Արթուր Առաքելյանը, հաղորդում է «Ա1+»-ը։
Կարճ ճանապարհով անցնելու համար մարդատար մեքենաների վարորդները կվճարեն մոտավորապես 10 դոլար։ Բոլոր տրանսպորտային միջոցների համար գին որոշելու նպատակով դեռ հաշվարկներ են կատարվում։
«Խիստ փոխկապակցված թվեր են, թե ինչքան կլինի երթևեկության ինտենսիվությունը, ինչքան կտնտեսվի վառելիք, մենք հիմա այդ հաշվարկներն ենք անում»,- նշել է Առաքելյանը։
Նրա խոսքով, առաջարկվում է վճարել 50 դոլար և անցնել Քաջարան-Սիսիան ճանապարհով։
«Առկա ճանապարհով երթևեկելով դուք կծախսեք 100 լիտր ավելի վառելիք, 2 և կես ժամ ավելի ժամանակ, և կհասնեք Սիսիան քաղաք։ Դուք հաշվում եք ու տեսնում, որ 100 դոլարի չափով ավել վառելիք ծախսեցիք, 2 և կես ժամ ժամանակ ավելի ծախսեցիք։ Եթե դուք բեռնափոխադրող ընկերություն եք 2 և կես ժամը փող արժի ձեզ մոտ»,- նշել է Արթուր Առաքելյանը։
Աղբյուրի հաղորդմամբ, վճարովի ավտոճանապարհի շինարարությունը կսկսվի, երբ կառավարությունը կորոշի կառուցող ընկերությանը։ Բանակցություններ այս պահին տարվում են մեկ եվրոպական և երկու չինական ճանապարհաշինարար ընկերությունների հետ։ –0–