ԵՐԵՎԱՆ, 18 հուլիսի. /Նովոստի–Արմենիա/. Հայաստանի Կենտրոնական բանկի սպառողների իրավունքների պաշտպանության և ֆինանսական կրթության կենտրոնը ներկայացրել է հանրապետության բնակչության հետաքրքրությունների փոփոխությունը ֆինանսական կրթման տեսանկյունից։
Կենտրոնի անցկացրած հարցումները ցույց են տվել, որ ֆինանսական գրագիտության մակարդակի բարձրացմանը զուգընթաց որոշ քաղաքացիներ սկսել են հետաքրքրվել կրիպտոարժույթներով գործարքներին։
Այսօր աշխարհում այդ թվային արժույթի նկատմամբ վերաբերմունքը կատարյալ հակադիր է, ոմանք համարում են այն ապագայի արժույթ, ոմանք էլ զգուշացնում են լուրջ ռիսկերի մասին։
Փորձագետների անհանգստության պատճառը հասկանալու համար «Նովոստի–Արմենիա» գործակալությունը դիմել է ՀՀ ԿԲ Սպառողների իրավունքների պաշտպանության և ֆինանսական կրթման կենտրոնի ղեկավար Արմենուհի Մկրտչյանին` պարզաբանումներ ստանալու համար։
Նա նշեց, որ կրիպտոարժույթը կարելի է համարել ֆինանսական խարդախության յուրօրինակ սխեմա։ Դրանք թվային փողեր են, որոնք չեն ենթարկվում որևէ կարգավորման և վերահսկողության։
«Բանն այն է, որ կրիպտոարժույթն ավելի նման է խաղադրույքի` ոչ ոք չգիտի, թե ինչ կկատարվի վաղը։ Այն չունի պահպանող արժեք, ի տարբերություն պետական արժեթղթերի»,– ասաց Մկրտչյանը։
Նրա խոսքով, պետական փողերը կամ արժեթղթերը երաշխավորվում են պետության կողմից և անհրաժեշտության դեպքում ապահովվում պետական գույքով և պահուստներով, մինչդեռ կրիպտոարժույթը ոչնչով չի ապահովվում և պղպջակ է հիշեցնում։
«Երբ մարդը ներդրումներ է իրականացնում ոլորտում, որը չի հասկանում, ապա ռիսկի է ենթարկում իր միջոցները։ Կորուստների դեպքում նա պաշտպանություն է խնդրում պետությունից, բայց այն տվյալ դեպքում չի կարող ոչնչով օգնել։ Այդ պատճառով մենք խորհուրդ ենք տալիս առավելագույնս խուսափել նմանատիպ գործարքներից, եթե դուք մասնագետ չեք և գլուխ չեք հանում ոլորտից»,– ասաց Մկրտչյանը։
Կենտրոնի ղեկավարը միաժամանակ ավելացրեց, որ բնակչության հետաքրքրությունը կրիպրոարժույթի նկատմամբ խոսում է տվյալ բնագավառում առկա ռիսկերի մասին իրազեկումն ակտիվացնելու մասին։
Նյութը պատրաստվել է ԱՄԻ «Նովոստի–Արմենիա»–ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում: -0-
