ԵՐԵՎԱՆ, 4 հուլիսի. /Նովոստի-Արմենիա/. Եկել է արձակուրդների ժամանակաշրջանը, և ամենաճիշտ ժամանակն է մտածել տարվա ամենագլխավոր հանգստի պլանավորման մասին: Այն ներառում է ինչպես բյուջեի պլանավորում, այնպես էլ տարբեր կազմակերպչական հարցերի լուծում, որոնք հատկապես շատ են, եթե ցանկանում եք արձակուրդն անցկացնել արտերկրում: Որքան ավելի լավ պատրաստվեք այդ հաճելի միջոցառմանը, այդքան ավելի լիարժեք կլինի ձեր հանգիստը: «Նովոստի-Արմենիա» գործակալությունը ներկայացնում է արձակուրդի պլանավորման որոշակի ալգորիթմ:
1. Արձակուրդային բյուջեի պլանավորում
Այն արձակուրդի պատրաստման կարևորագույն փուլերից է, հակառակ դեպքում ձեր սպասումները կարող են վերածվել հիասթափության, և հանգիստը փչացած կլինի: Եվ այսպես, ինչպես է պլանավորվում բյուջեն.
- Որոշեք, թե որքան գումար կարող եք ծախսել արձակուրդի ընթացքում: Դա շատ կարևոր է, քանի որ այդ գումարից կախված կլինի մնացած ամեն ինչ:
- Ինչի հաշվին կհատկացվի այդ գումարը, օրինակ` կուտակումների, վարկի կամ ընթացիկ ծախսերի:
- Կոնկրետ ինչի վրա է ծախսվելու գումարը: Այստեղ ներառվելու են, օրինակ, տրանսպորտային ծախսերը (երկու ուղղությամբ), հյուրանոցային համարը կամ մասնավոր տան վարձակալությունը, սննդի, էքսկուրսիաների համար նախատեսված գումարը, ամենօրյա ծախսերը և այլն:
- Հնարավո՞ր են, արդյոք, շեղումներ նախատեսված գումարից: Եթե այո, ապա որքանո՞վ:
Ակնհայտ է, որ հնարավոր չէ ամեն ինչ պլանավորել, անպայման կլինեն չնախատեսված ծախսեր: Այդ իսկ պատճառով ձեր բյուջեում ներառեք չնախատեսված ծախսերը, ինչի վրա անհրաժեշտ է հատկացնել բյուջեի գումարի 5-10%–ը: Նպատակահարմար է, որպեսզի «արձակուրդայինը» չգերազանցի ամսական եկամուտը, հակառակ դեպքում ձեր հանգիստը չի ներառվի ձեր միջոցների շրջանակում, ինչը ցանկալի չէ, քանի որ դա ապագայում կհանգեցնի խնդիրների:
2. Սեփական հանգստի պլանավորում
Այս փուլում ամենակարևորն է գտնել այնպիսի տարբերակ, որպեսզի հանգիստը լինի ձեր սրտով և միաժամանակ դուրս չգա նախատեսված բյուջեից: Հնարավոր տարբերակներն են.
- Ամենահարմարն է գնել «Ամեն ինչ ներառված է» տուրը: Այս դեպքում բյուջեի մեծ մասը կհատկացվի տուրի վճարմանը: Բացի այդ, անհրաժեշտ կլինի որոշակի գումար հետ դնել առօրյա և չնախատեսված ծախսերի համար:
- Եթե դուք չեք վախենում դժվարություններից, կարող եք ինքնուրույն կազմակերպել ձեր հանգիստը. հասնել ընտրված հանգստավայր, ընտրել հյուրանոցային համարը (համացանցի միջոցով հնարավոր է նախօրոք ամրագրել հյուրանոցահին համարը) կամ վարձակալել առանձնատուն B&B սեկտորում (այն նույնպես կարելի է ամրագրել համացանցի միջոցով): Դուք կարող եք պլանավորել նաև ձեր ժամանցը, նախապես ուսումնասիրել ընտրված վայրի տեսարժան վայրերը նույն համացանցի միջոցով: Այս դեպքում ձեր արձակուրդային բյուջեն պետք է համապատասխանի հանգստի այդ տարբերակին:
- Կարելի է նաև կազմակերպել «վայրի» հանգիստ` ոչինչ չպլանավորելով և հույսը դնելով պատահականության վրա: Նման հանգիստն ավելի հարմար է երիտասարդներին, որոնք չեն ձգտում հարմարավետության և հանգիստ միջավայրի, ունեն ավելի ակտիվ դիրքորոշում: Այս դեպքում արձակուրդային բյուջեն ավելի լավ է բաժանել արձակուրդային օրերի քանակի վրա և փորձել չգերազանցել մեկ օրվա համար նախատեսված գումարը:
Բյուջեի և հանգստի պլանն ավելի լավ է կազմել գրավոր` օգտագործելով աղյուսակներ կամ այլ հավելվածներ: Այդպես ավելի հարմար կլինի վերահսկել բյուջեի կատարումը:
3. Երևակայական ճամփորդություն
Մինչ ուղևորություն խորհրուրդ է տրվում կատարել վիրտուալ ճամփորդություն, որպեսզի նախապես մտածել, թե ինչպես կարելի է անցկացնել արձակուրդի յուրաքանչյուր օրը, ուր այցելել։ Դա կօգնի ձեզ ավելի կազմակերպված և հագեցած դարձնել ձեր հանգիստը: Միաժամանակ պետք է անպայման հաշվի առնել հնարավոր ծախսերը, գոնե մոտավորապես: Նման մոտեցումը կօգնի նվազեցնել չնախատսված ծախսերը և չգերազանցել պլանավորված բյուջեն:
4. Ինչպես վճարել ծախսերը
Ավելի լավ է նախօրոք վճարել այն ամենի համար, ինչ հնարավոր է, օրինակ` ավիատոմսեր, հյուրանոցային համար և այլն: Հնարավոր է` դուք անգամ կարողանաք գումար տնտեսել: Իսկ արդեն ուղևորության ժամանակ դուք ստիպված կլինեք վճարել բանկային քարտով կամ կանխիկ գումարով: Եթե մեկնում եք երկրից դուրս, նախօրոք ձեռք բերեք միջին մակարդակի միջազգային բանկային քարտ, որպեսզի այն արգելափակված չլինի արտերկրում գործարքների համար: Բացի այդ, որոշակի ծախսերի համար ձեզ անհրաժեշտ կլինի կանխիկ գումար: Այդ իսկ պատճառով նախօրոք որոշեք, թե որքան գումար կարելի է վերցնել կանխիկով, իսկ որքան` փոխանցել քարտի վրա:
Նյութը պատրաստվել է ԱՄԻ «Նովոստի–Արմենիա»–ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում: -0-