ԵՐԵՎԱՆ, 19 հոկտեմբերի. /Նովոստի–Արմենիա/. Մարդիկ սիրում են հաշվել սեփական փողերը, և մեզնից շատերը դա անում են կանոնավոր կերպով։ Իհարկե, գումար տնտեսելը բավականին բարդ խնդիր է` հաշվի առնելով այն, որ շուկայում պարբերաբար հայտնվում են նոր ապրանքներ, և դրանք ձեռք բերելու գայթակղությունը շատ մեծ է։ Միաժամանակ, պետք չէ մոռանալ դրամական միջոցներն արդյունավետ ծախսելու մասին։ Ինչպես ցույց է տալիս պրակտիկան, միշտ չէ, որ մեր ծախսերը հիմնավորված են, այդ պատճառով մենք պետք է սովորենք ճիշտ տնտեսել։ Դա հնարավոր է անել` հետևելով մի քանի դյուրին կանոնների։ «Նովոստի–Արմենիա» գործակալությունը հրապարակում է գումար տնտեսելու յոթ դասական «բաղադրատոմսեր», որոնք կարող են օգտակար լինել։
1. Գումարի տնտեսում գնումներ կատարելիս
Բյուջեի տնտեսումը սկսվում է ամենասովորականից` ամենօրյա գնումներից։ Խանութ գնալիս անպայման կազմեք անհրաժեշտ ապրանքների ցանկը և հստակ հետևեք դրան։ Սուպերմարկետներում ընտրեք փոքրիկ զամբյուղներ, այլ ոչ թե մեծ սայլակներ։ Ոչ մեծ զամբյուղը հոգեբանական տեսակետից ձեզ «թույլ չի տա» այն լցնել չպլանավորված իրերով կամ մթերքով։ Միշտ համեմատեք ապրանքի նույն տեսակների գները, դա կօգնի ընտրել առավել օպտիմալ տարբերակը ապրանքների լայն տեսականուց։ Աշխատեք վճարել կանխիկ գումար, քանի որ պլաստիկ քարտերը հաճախ խանգարում են տնտեսել, քանի որ մենք դրանք չենք ընկալում որպես փող և աջ ու ձախ մեծ գումարներ ենք վատնում։ Իսկ կանխիկ գումարից շատ ավելի դժվար է բաժանվել։
2. Տնտեսում ենք կոմունալ վճարումներում
Այսօր բոլոր տներում տեղադրված են հաշվիչներ, որոնք հստակ ֆիքսում են օգտագործված ջրի, գազի և էլեկտրաէներգիայի քանակը։ Միաժամանակ, դեռ կան մարդիկ, ովքեր օգտվում են էլեկտրական ջրատաքացուցիչներից և ջեռուցման սարքերից, որոնք ավելի լավ է փոխարինել անհատական ջեռուցման համակարգերով, ինչը զգալիորեն կնվազեցնի կոմունալ ծառայությունների ծախսերը։
Անհրաժեշտ է նաև վերահսկել սանտեխնիկայի վիճակը և անհապաղ վերանորոգել ծակ ծորակները, քանի որ նրանք օրական առնվազն 30 լիտր ջուր կարող են բաց թողնել։ Հրաժարվեք ձեզ ոչ պետքական կոմունալ ծառայություններից, եթե չեք ցանկանում զուր փող վատնել, օրինակ, եթե դուք երկար ժամանակով բացակայում եք տնից։
3. Պլանավորումը տնտեսման «քույրն է»
Սովորություն դարձրեք ամեն ամսվա սկզբին գրանցել նախատեսվող ծախսերը։ Դա շատ է օգնում ինչպես սեփական, այնպես էլ ընտանեկան բյուջեն տնտեսելու տեսանկյունից։ Ժամանակ առ ժամանակ նայեք ցուցակը` համեմատելով նախատեսված և իրականացված ծախսերը։
4. Փողերը բանկում պահեք
Բանկերում ներդրված ավանդները տնտեսման բավականին արդյունավետ միջոց է։ Ամենակարևորը հուսալի բանկ ընտրելն է։ Դա թույլ կտա ոչ միայն պահպանել ձեր դրամական միջոցները, այլև տոկոսներ աշխատել ձեր իսկ խնայություններից։
5. Առանց սուր անհրաժեշտության բանկերից վարկեր մի վերցրեք
Տեղի մի տվեք ձեր ցանկություններին։ Մի հավաքեք անիմաստ պարտքեր։ Վարկերը միայն կստիպեն ձեզ ավելորդ ծախսեր կատարել։ Լավ մտածեք` պե՞տք է ձեզ վարկ, թե՞ ոչ, և կհասցնե՞ք այն բարեխղճորեն վճարել և ժամանակին փակել, եթե, այնուամենայնիվ, որոշել եք վերցնել։
6. Փնտրեք ամենաբարենպաստ տարբերակը
Ծախսերը նախատեսելով` ուսումնասիրեք շուկան և համեմատեք գները։ Մեր նախատեսված գնումները ոչ միշտ են օպտիմալ լինում։ Մասնավորապես, նախկան մեծ գնում կատարելն անհրաժեշտ է ծանոթանալ բոլոր առկա առաջարկներին։
7. «Սև» օր
Գումար խնայել «սև» օրվա համար շատ օգտակար է։ Փորձեք անել դա ամեն ամիս` աշխատավարձ ստանալիս։ Դա կօգնի ոչ միայն տնտեսել, ալև մեծ գումար կուտակել։ –0–
