ԵՐԵՎԱՆ, 16 ապրիլի./Նովոստի–Արմենիա/. Հայաստանում մեկնարկել է «Իմ Ֆինանսների Ամիս» մասշտաբային միջոցառումների ծրագիրը։
Ինչպես ծրագրի մեկնարկի ժամանակ նշեց ՀՀ ԿԲ Խորհրդի անդամ Արմենակ Դարբինյանը, միջոցառումն արդեն դառնում է ավանդական և անցկացվում է 5–րդ անգամ։
Загружается новость ... "Лево"
«Միջոցառման հիմնական նպատակն է զարգացնել ֆինանսական գիտելիքներն ու հմտությունները, տրամադրել մատչելի տեղեկատվություն առավել կարևոր թեմաներով, այդ թվում ` ինչպես արդյունավետ տնտեսել, պլանավորել եկամուտներն ու ծախսերը, խուսափել պարտքերի կուտակումից, ում դիմել ֆինանսական ոլորտում սեփական իրավունքները պաշտպանելու համար, ինչպես խուսափել ֆինանսական խարդախություններից և կեղծիքներից», – ասաց Դարբինյանը։
ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի կոորդինատոր Սևակ Միքայելյանն իր հերթին նշեց, որ բնակչության ակտիվ մասնակցությունը միջոցառումներին աճում է։ Միայն 2017 թ.–ին մասնակցել է մոտ 10 հազար մարդ` սկսած դպրոցականներից և ուսանողներից մինչև բնակչության տարբեր խմբեր։
«Այս տարի մենք նախատեսել ենք ինչպես ավանդական, այնպես էլ նոր միջոցառումներ թիրախային տարբեր խմբերի համար` հաշվի առնելով ժամանակակից մարտահրավերները և զարգացումները», – ասաց Միքայելյանը։
Նրա խոսքով, կանցկացվեն արդեն ավանդական դարձած միջոցառումները` «ֆինանսական շրջագայություններ», որոնց շրջանակում մասնակիցներն այցելում են բանկեր, ապահովագրական ընկերություններ, ֆինանսական հաշտարարի գրասենյակ, ֆոնդային բորսա, կարող են տեղում ծանոթանալ կառույցների գործունեությանն ու տալ իրենց հետաքրքրող հարցերը։
Նախատեսվում է կազմակերպել նաև մի շարք բաց սեմինարներ, որոնք ԿԲ–ն կազմակերպում է ինչպես Երևանում, այնպես էլ Դիլիջանում։ Կկազմակերպվեն նաև ֆինանսական թեմանով տարբեր մրցույթներ, այդ թվում` ֆինանսատնտեսական բրեյն–ռինգ, որի ընտրական փուլին մասնակցել են 150 դպրոցների աշակերտներ։
Նորարարությունների թվում նա նշեց Վիքիպեդիայի հետ համատեղ անցկացվող մրցույթը, որի շրջանակում կպատրաստվեն ֆինանսական թեմայով տարբեր նյութեր, որոնցից լավագույնները կտեղադրվեն ռեսուրսի հայկական տարբերակում։
Բացի այդ, ուսանողների համար նախատեսված է «Խնայողություններ» խաղը` նրանց շրջանում տնտեսելու և խնայելու մշակույթը սերմանելու նպատակով։ Նախատեսվում է նաև կազմակերպել քննարկումներ փորձագետների հետ, Բաց դռների օրեր կուտակային կենսաթոշակային ֆոնդերում, Ավանդների հատուցումը երաշխավորող հիմնադրամը կգործարկի բջջային և վիրտուալ բորսայի խաղ։
«Առաջին անգամ կներկայացվի նոր խաղ, որը կանցկացվի Սիթիզեն մանկական քաղաքում: Խաղը երեխաների մոտ կզարգացնի անձնական ֆինանսները կառավարելու բազիսային կարողություններ», – նշեց Միքայելյանը։
Նրա խոսքով, երեխաների համար նախատեսված է նաև բյուջետիկ խաղ, որը թույլ կտա երեխաներին ծանոթացնել ֆինանսական ոլորտի հիմունքներին։ Այս համագործակցության շրջանակում նախատեսված է անցկացնել Երեխաները ֆինանսների մասին ծրագիրը, որի ընթացքում 7-13 տարեկան երեխաները հարցազրույցների ընթացքում կստանան սպառիչ պատասխաններ խնայողություն, վճարային քարտեր, վարկ, փող և ապահովագրություն թեմաների վերաբերյալ: Երեխաների հարցերին պատասխանելու են ֆինանսական ոլորտի առաջատար մասնագետները:
Կկազմակերպվի նաև ՖինՄարզում ծրագիրը, որի ընթացքում 6 մարզերում կիրականացվեն սեմինարներ 7 հիմնական թեմաներով (տնտեսություն, անձնական բյուջեյի կառավարում, խնայողություն, պարտք, գնումներ, իրավունքների պաշտպանություն, զեղծարարություններ և խարդախություններ)։
Միջոցառմանը կմասնակցեն ԿԲ–ի, Հայաստանի բանկերի միության, Ֆինանսական հաշտարարի գրասենյակի, Ավանդների հատուցումը երաշխավորող հիմնադրամի, NASDAQ OMX Armenia–ի և այլ կառույցների ներկայացուցիչներ։
Ծրագրի և ծրագրի մասնակցության վերաբերյալ մանրամասն տեղեկատվություն առկա է www.abcfinance.am կայքում, ինչպես նաև համանուն facebook-յան, twitter-յան և Instagram-յան էջերում:
Նյութը պատրաստվել է ԱՄԻ «Նովոստի–Արմենիա»–ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում
