Փաշինյանը շնորհավորեց Հրանտ Մաթևոսյանի 84–ամյակը` հատված ընթերցելով նրա ժողովածուից (ՎԻԴԵՈ)

ԵՐԵՎԱՆ, 12 փետրվարի. /Նովոստի–Արմենիա/. Հայաստանի վարչապետ Նիկոլ Փաշինյանն իր հերթական live–ը նվիրել է հայտնի հայ գրող Հրանտ Մաթևոսյանին։

«Այսօր փետրվարի 12–ն է` Հրանտ Մաթևոսյանի ծննդյան օրը, և, կարծում եմ, սա լավ առիթ է սկսել օրը նրա «Ծառերը» ժողովածուից մի հատված ընթերցելով»,– ասել է Փաշինյանը` կարդալով Մաթևոսյանից մի հատված։

Վարչապետի կարծիքով, այդ տողերում այլաբանորեն նկարագրված է մոտավորապես այն, ինչ կատարվեց նախորդ տարվա գարնանը Հայաստանում։ «Ըստ էության, մենք կատարեցինք ոչ բռնի թավշյա հեղափոխություն` կատարելով Հրանտ Մաթևոսյանի պատգամը, մենք ցույց տվեցինք, որ մեզ չի կարելի կոտրել»,– ասաց Փաշինյանը։

Հրանտ Մաթևոսյանը (1935-2002 թթ.) հայ ականավոր գրող է, վիպակների, պատմվածքների և կինոսցենարների հեղինակ է («Մենք և մեր սարերը», «Աշնան արև», «Խումհար», «Հացը» և այլն)։ Հայաստանի, ԽՍՀՄ–ի պետական մրցանակի դափնեկիր է։ 1995-2000 թվականներին եղել է Հայաստանի խորհրդարանի պատգամավոր։ -0-